Premyer Liqada XXXV tur həyacanı - YENİLƏNİR

Ardıcıl 3-cü çempionluğunu təmin edən “Qarabağ” autsayder “Rəvan”ın qonağı olacaq. Görüş ağdamlılar üçün əhəmiyyətsiz olsa da, Bəhmən Həsənovun yetirmələri üçün Premyer Liqadakı yerini qoruya bilmək baxımından olduqca vacib oyundu. Qarşılaşmanın şəksiz favoriti olan “köhlən atlar” bundan qabaqkı 3 oyunda da rəqibinə şans verməyib.

Çempionatın digər autsayderi “Xəzər Lənkəran” isə “Sumqayıt”ı qəbul edəcək. Əsas hədəfi elitada qalmaq olan və bunun üçün “Rəvan”la qiyabi mübarizə aparan cənublular “Sumqayıt”la da qonşu pillələrdə qərarlaşsalar da, aradakı xal fərqi baxımından iki klub arasında intriqa yoxdu. Finişə 3 tur qalmış baş məşqçisiz qalan “ağ-yaşıllar” məhdud heyətlə əsas liqadakı yerini qorumaq üçün “Sumqayıt”ı xalsız yola salmalıdı.

Günün diqqətçəkən qarşılaşmalarından biri Masazırda baş tutacaq. Bakıda keçirilən U-17-lərin Avropa çempionatı ilə əlaqədar, “Əlincə Arena”dan yararlanan “Neftçi” avrokuboklara buraxılmamaq sanksiyası ilə üzləşən “İnter”i qəbul edəcək. Vəli Qasımovun yetirmələri kubokda finala çıxsalar da, işlərini möhkəm tutmaq üçün çempionatda da lazımi pillədə qərarlaşmaq istəyirlər. Bunun üçün isə “bankirlər” üzərində qələbə lazımdı.

Premyer Liqanın debütantı “Zirə” ilə cari mövsümdə yenidən elitada çıxış edən “Kəpəz”in qarşılaşması da maraqlı oyun vəd edir. Gəncə klubu 3-cülük iddialarını davam etdirmək üçün artıq “gümüş” qazanacağı heç kəsdə şübhə doğurmayan rəqibi ilə oyunda xal itirməməlidilər. İkilinin öz aralarındakı nəticələrə nəzər salsaq, Şahin Diniyevin yetirmələrinin öndə olduğunu görmək olar. İlk üç oyundan sonra 2 qarşılaşma bərabərə bitibsə, bir oyunda gəncəlilər sevinib.

Cari mövsümdə qeyri-stabil çıxışla yadda qalan “Qəbələ” isə avrokuboklara digər iddialı AZAL ilə münasibətləri ayırd edəcək. Ölkə kubokunda mübarizəni dayandıran Roman Qriqorçukun komandası bütün diqqətini çempionata yönəldərək, turnir cədvəlində yuxarı pillələrə qalxmaq niyyətindədi. “Zirə” və “İnter”in avrokuboklara buraxılmaması ilə əlaqədar, Avroliqaya çıxmaq şansları olan AZAL isə əlinə düşən imkandan lazımınca faydalanmaq arzusundadı. Odu ki, bu komandaların görüşünün də gərgin mübarizə şəraitində keçəcəyini təxmin etmək olar. Cari mövsümdə 3 dəfə üz-üzə gələn rəqiblərin duelində 1 dəfə “Qəbələ”, 1 dəfə AZAL sevinib, digər görüşdə isə heç-heçə qeydə alınıb.