Bakı, 1 avqust, AZƏRTAC
Türkiyənin Antalya şəhərində açılan "Expo 2016 Antalya" sərgisi türk musiqi sənətçilərilə yanaşı, dünya ulduzlarını da mütəmadi qəbul etməkdədi.
AZƏRTAC "CNN Türk" telekanalının saytına istinadla xəbər verir ki, Antalyada konsert vermək üçün Türkiyəyə gəlmiş əslən Yamaykadan olan, gənclərin sevimlisi, dünya şöhrətli ulduz Sean Paul "Expo 2016" sərgisini ziyarət edib. Sərginin təşkilatçılarından olan direktor köməkçisi Levend Murat Danışman estrada ulduzunu qarşılayıb. Daha sonra sərgilə tanış olmaq üçün öz kollektivi ilə əraziyə gələn Sean Paul burda "Ficus Nitida" (Küçə Benjamini) ağacını əkib. O deyib: " Ağacları çox sevirəm, onlar dünyamız üçün çox önəmlidir. İlk dəfədir ki, Antalyaya gəlirəm, ancaq burda bir ağacım var".
Qeyd edək ki, S. Paul ağacın üzərində öz adını daşıyan kiçik məlumat lövhəsi də asıb. Ulduzun yaxın vaxtlarda Antalyada möhtəşəm konserti planlaşdırılır.
