Dövlət Təhlükəsizliyi Xidməti (DTX) daha bir antiterror əməliyyatı aparıb. Oktyabrın 25-də həyata keçirilmiş əməliyyatda hədəf yenə də partlayıcı maddələr əldə edərək dini ekstremizm zəminində Azərbaycan Respublikası ərazisində terror aktları planlaşdıran bir qrup şəxs olub.
Rəsmi məlumata görə, müəyyən edilib ki, Azərbaycanın hüdudlarından kənarda fəaliyyət göstərən dini ekstremist terror təşkilatının tabeçiliyini qəbul etmiş bir qrup şəxs Bakının Qaradağ rayonunun Lökbatan qəsəbəsində "Abdullah" ləqəbli Ələkbərov Bəxtiyar Məmmədsadıq oğlunun yaşadığı evdə toplaşaraq onu cinayətkar birliyin tərkibində özlərindən ibarət dəstənin "əmir"i seçiblər. Onlar ölkədə sabitliyi və təhlükəsizliyi pozmaq, ictimai-siyasi qarışıqlıq yaratmaq məqsədilə 2017-ci il oktyabrın 28-də Bakı şəhərində keçiriləcək mitinqdə terror aktı törətmək barədə razılığa gəliblər.
DTX tərəfindən həyata keçirilən əməliyyat zamanı cinayətkar dəstənin 3 üzvü - Azərbaycan vətəndaşları Ələkbərov Bəxtiyar Məmmədsadıq oğlu, "Əbu-Yunis" ləqəbli Məsimli Anar Mehman oğlu, "Əbu-Vakkaz" ləqəbli Hüseynli Cavid Hüseyn oğlu odlu silahla müqavimət göstərərkən xüsusi əməliyyat qrupu tərəfindən məhv ediliblər.
Qeyd edək ki, DTX-nın təxminən son bir ildə Bakıda və respublikanın müxtəlif rayonlarında həyata keçirdiyi antiterror əməliyyatları nəticəsində 15-ə yaxın dini radikal ekstremist məhv edilib, bir neçəsi isə həbs olunub. Onlar ölkə ərazisində müxtəlif yerlərdə terror aktları planlaşdırırmışlar. Hüquq-mühafizə orqanlarındakı mənbələrdən Milli.Az-a verilən məlumata görə, məhv edilən terrorçular, o cümlədən saxlanılan şəxslərın hamısı sələfi (el arasında "vəhhabilər" də deyilir - red.) təriqətinin ardıcılları olublar. Cinayətkarlar "İŞİD"in və islam dini adından sui-istifadə edərək terrorçuluq fəaliyyəti məşğul olan digər qrupların sıralarında olmuş və ya onlara təəssübkeşlik etmiş şəxslərdir.
Görəsən, din pərdəsi ilə maskalanmış bu cinayətkarlar niyə Azərbaycanda ciddi-cəhdlə terror aktları törətmək istəyirlər? Terrorçuların, ekstremistlərin, dini radikalların mənfur planlarının qarşısını almaq üçün daha hansı profilaktik tədbirlər görülməli və ya qadağalar qoyulmalıdır?
Bununla bağlı məsələlərə aydınlıq gətirən xüsusi xidmət orqanlarının yüksək rütbəli sabiq əməkdaşı, təhlükəsizlik və geosiyasi məsələlər üzrə ekspert Arzu Nağıyev Milli.Az-a bildirib ki, DTX-nın keçirdiyi son əməliyyat bir daha göstərdi ki, heç bir dövlət terrordan sığortalanmayıb və bu proses Azərbaycanda da davam edir:
Lakin A.Nağıyevin fikrincə, bu istiqamətdə daha çox işlərin görülməsinə ehtiyac var: "Bu hadisə, DTX-nın əməliyyat şəraitinə nəzarət etdiyini göstərir. Azərbaycan üçün bu çox mühüm amildir. Düşünürəm ki, bu tədbirlər davam etdiriləcək. Lakin bu istiqamətdə atılan addımlarda təkcə xüsusi-xidmət, hüquq-mühafizə orqanları deyil, Azərbaycan vətəndaşları da öz töhfəsini verməli, ayıq-sayıqlığını itirməməlidirlər. Eləcə də Dini Qurumlarla İş üzrə Dövlət Komitəsi və Qafqaz Müsəlmanları İdarəsi də maarifləndirmə işlərini genişləndirməlidir.
Ümumiyyətlə, terrorçuların partlayıcı maddələri əldə etməsi və onları sınaqdan keçirməsi göstərir ki, yerli hüquq-mühafizə orqanları bu istiqamətdə nəzarətini gücləndirməli, eyni zamanda maarifləndirmə işləri aparmalıdır".
Terrorçuların ardıcılı olduğu dini təriqətin Azərbaycanda ideyalarının yayılmasına və onun mənfi nəticələri ilə bağlı məqama gəlincə, ekspert hesab edir ki, bu məsələdə insanların dini azadlıqlarını məhdudlaşdırmamaq şərtilə dövlətə və cəmiyyətə təhlükə törədən və ya törədə biləcək şəxslər, qruplar dərhal zərərsizləşdirilməlidir: "Sələfilik dünyanın bir sıra ölkələrində dövlət siyasətinin mühüm tərkib hissəsinə çevrilib. Lakin əsas problemlərdən biri onun radikallaşmasıdır. Bu radikallığın da qarşısını almaq üçün kompleks tədbirlər həyata keçirilməlidir. Təbii ki, heç bir insanı dini inancına görə təqib etmək olmaz, lakin radikallaşanda onun qarşısı ən sərt formada alınmalıdır".
İlkin İzzət
Milli.Az
Digər maraqlı xəbərlər Milli.Az-ın Facebook səhifəsində
