A–
Kuala-Lumpur, 19 fevral, AZƏRTAC
Malayziyanın hakimiyyət orqanları əcnəbilərin işə qəbuluna qadağa qoyub. Bu qadağa əməkçi miqrantların gəldiyi bütün ölkələrə tətbiq ediləcək. Bu barədə fevralın 19-da Bernama informasiya agentliyi məlumat yayıb.
Baş nazirin müavini və daxili işlər naziri vəzifəsini icra edən Əhməd Zahid Hamidinin sözlərini sitat gətirən agentlik yazır: “Əcnəbilərin işə qəbulu ilə bağlı tətbiq edilən qadağa müvəqqəti xarakter daşıyır. Bu qadağa iqtisadiyyatımız üçün lazım olan əcnəbi işçilərin sayı dəqiqləşdiriləndən sonra ləğv ediləcək”.
Ə.Z.Hamidinin sözlərinə görə, hökumət əcnəbilərin işə qəbulu ilə bağlı mövcud proqrama yenidən baxmağı planlaşdırır. O deyib: “Biz Malayziya ərazisinə başqa ölkələrdən qeyri-qanuni yolla gələn işçilərlə ciddi mübarizə aparacağıq. Ölkəmizə qeyri-qanuni yolla gələn əcnəbi işçilər həbs ediləcək, cərimə olunacaq və öz ölkələrinə sürgün ediləcəklər”.
Malayziyada əcnəbi işçilərin işə qəbulu çox geniş yayılıb. Əcnəbilər (əsasən qonşu İndoneziyadan gələnlər) əsasən az ixtisaslaşmış, ağır zəhmət tələb edən və aşağı əməkhaqqı ödənilən xidmət və tikinti sahələrində çalışırlar.
Vüqar Ağayev
AZƏRTAC-ın xüsusi müxbiri
Kuala-Lumpur
AZERTAG.AZ :Malayziyada əcnəbilərin işə qəbuluna qadağa qoyulub
