Dünya yüngül atletikasının canlı əfsanəsi, yamaykalı sprinter Useyn Bolt Braziliyanın Rio-de-Janeyro şəhərində keçirilən Yay Olimpiya Oyunlarında növbəti qızıl medalını qazanıb. O, artıq 8-ci dəfə Olimpiya çempionu olub.
Milli.Az Daily Mail-ə istinadən bildirir ki, "İldırım adam" kimi tanınan 29 yaşlı Useyn Bolt 200 metr məsafəyə qaçışı 19,78 sniyəyə başa vurub. Yarışda gümüş medalı 20,02 saniyəlik nəticə ilə kanadalı atlet Andre de Qrasse, bürüncü isə 20,12 saniyə ilə fransız Kristof Lemetr qazanıblar.
Avqustun 14-də Useyn Bolt 100 metr məsafəni 9,81 saniyəyə qət edərək qızıl medal qazanmışdı.
Martın 22-də Bolt bəyan etmişdi ki, Rio-2016 onun üçün son Olimpiada olacaq. O, gələn il keçiriləcək dünya çempionatından sonra peşəkar idmançı karyerasını başa vurmaq niyyətindədir.
Pekin-2008 və London-2012 Olimpiya Oyunlarında 100, 200 metr məsafəyə qaçışlarda və 4x100 estafetində Bolt 6 qızıl medal qazanmışdı.
London Olimpiadasının təntənəli açılış mərasimində o, Yamayka yığmasının bayraqdarı idi.
Milli.Az
