Milli.Az xəbər verir ki, hadisə zamanı öldürülən Azər Məmmədovun ölüm anında yanında olan şəxs cinayətin bütün təfərrüatlarını azxeber.com-a danışdı.
Bir neçə gündür ölkə gündəmini zəbt edən “Avropa” otelində baş verən dəhşətli cinayət nəticəsində qətlə yetirilən “Zaminbank”ın Nəsimi filialının sədri Azər Məmmədovun ölümündə şübhəli bilinən iki şəxs artıq həbs edilib.
Həbs edilənlər Sənan Quliyev və Mövlud adlı şəxslərdir.
Hadisə ilə bağlı cinayətdə təqsirləndirilən Mövlud adlı şəxsin vəkili “qafqazinfo”ya açıqlama verib. Vəkilin sözlərinə görə, təqsirləndirilən şəxslər ifadələrində bildiriblər ki, həmin gün ora ilk dəfə gəliblər: “Hərəsinə 100 manat ödəniş edib məşq eləməyə başlayıblar. Sənanla Mövlud bir-biri ilə güləşərkən Ruslan Əfəndiyev bir neçə tələbəsi ilə zala girib. Sənanın ayağında “borisovka” ayaqabbısı olub. Ruslan deyib ki, tatami üzərinə o ayaqqabı ilə çıxmayın. Bunlar üzrxahlıq edib deyiblər ki, birinci dəfədir gəlmişik, bilmədik. Sonra gedib digər zalda dəmir alətlərlə məşq ediblər. Hamama gedəndə Mövlud idman zalından verilən ayaqqabı ayağında olarkən qayıdıb tataminin qırağından dəsmalı götürüb. Bu dəfə isə Ruslan ona “sən nə “ponyatkasız” adamsan, bayaq dedim axı ayaqqabı ilə keçmə” deyib. Mövlud da cavabında “zalın öz ayaqqabısı ilə də tatamiyə çıxmağın qadağan olduğunu bilmirdim”. Növbəti dəfə də təsadüfdən şkafın açarları zalda qaldığını görən Mövlud açarı götürmək üçün zala girəndə Ruslan Əfəndiyevlə yenidən üz-üzə gəlir. Üzrxahlıq edir ki, yenə bura gələcəyik, aramızda qanqaraçılıq olmasın. Ruslan Əfəndiyev “bir də belə qanacaqsızlıq eləməyin” dedikdə, Mövlud bildirib ki, “biz qanacaqsız deyilik, bizi qanacaqsız hesab edən özü qanacaqsızdır. Və nəticədə onlar dalaşmağa başlayıblar. Nəticədə bu hadisə baş verib”.
Azxeber.com bu ölkə gündəmini zəbt edən bu hadisənin əsas iştirakçısı, mərhum Azər Məmmədovun müəllimi və hadisə zamanı döş qəfəsindən yaralanan Ruslan Əfəndiyevlə çətinliklə də olsa əlaqə saxlayıb. Ruslan Əfəndiyev cinayəti törədən şəxsin vəkilinin hadisəni tamamilə təhrif etdiyini bildirib. Sözügedən olayın iştirakçısı olmuş Ruslan Əfəndiyevin verdiyi müsahibəni təqdim edirik:
- Ruslan bəy, həbs edilən Mövludun vəkili iddia edir ki, onlar tatami üzərinə ikinci dəfə çıxdıqları zaman “bir də belə qanacaqsızlıq eləməyin” demisiniz. Hadisənin əsas iştirakçısınız. Bu haqda nə deyə bilərsiniz?
- Vəkilin hadisə ilə bağlı dediklərinin çoxu təhrif edilmiş məlumatlardır. Mən tələbələrimlə birlikdə (red: qətlə yetirilən Azər Məmmədovda onlardan biridir) zala daxil olduğumda, onlar artıq tataminin üstünə çıxmışdılar. Onlardan birinin ayağında “borisovka” ayaqabbısı, digərində isə “şəpit” var idi. Mən bunu görəndə, bir müəllim kimi onlara dedim ki, bu formada tatami üzərinə çıxmaq olmaz. Çünki orada məşq edilir və tatami çirklənir. Onlar mənə "yaxşı" deyib getdilər. İkinci dəfə onlardan biri (red: Mövlud) yenidən əşyalarını götürmək üçün tataminin üstündən keçərək çamadanını götürdü. Mən buna ikinci dəfə başa saldım ki, bunun üzərinə ayaqqabı ilə çıxmaq olmaz. Bəyaq da bu sözü ona dediyimi xatırlatdım. O da mənə cavabında “sənin mənim ponyatkama şübhən var?” deyə cavab verdi. Mən də dedim ki, uzatmayın, məşqimiz var. Çıxın gedin. Onlar da çıxıb getdilər.
- Məşqə başladıqdan sonra siz onları bir də gördünüzmü?
- Biz 40 dəqiqə məşq etdik. Bu müddətdə onlar zalın ətrafında gəzir, bizə baxıb gedirdi. Məşqi qutardıqdan sonra Mövlud məni kənara çağırıb nəsə deyəcəyini söylədi. Mən də yaxınlaşdım. Yaxınlaşan kimi mənə sual verdi ki, bəs sən polis əməkdaşısanmı? Mən də cavabında polis işçisi olmadığımı və ümumiyyətlə bunun nə əhəmiyyət daşıdığını ondan soruşdum. Sonra yenidən söhbəti başladı. Mən də yenidən başa saldım ki, sənin ora çıxmağın düz deyil. Həm də mən sənə iki dəfə xəbərdarlıq etdim. Yenə mənə qayıtdı ki, “sənin mənim ponyatkama şübhən var?” Mən yenə təmkinlə onu başa salmağa çalışdım. Bu zaman mənim ünvanıma təhqiramiz ifadə işlətdi (red: etik ifadə olmadığı üçün qeyd etmirik). Gördüm ki, bu sözü dediyi vaxt dodaqları titrəyir. Bildim ki, mənə yumruq atacaq. O yumruğu atdığı zaman aşağı əyildim və zərbə məndən yan keçdi. Yanındakı da bu zaman mən əyiləndən sonra yumruq atdı. Onu da dəf etdim. Bu zaman ikisi də qaçmağa başladı.
- Azər Məmmədov sizin yanınızda idi?
- Azər duş kabinindən çıxandan sonra hadisəni gördü. İkisinin də mənim üstümə gəldiyini görən kimi mənə köməyə gəldi . Və Sənanı itələməyə başladı. Emin də qaçaraq yanımıza gəldi və Azərlə bir yerdə onları məndən uzaqlaşdırmağa çalışdılar. Biz onaları itələyə-itələyə holla tərəf apardıq. Holla çatanda Sənan mənə tərəf qaçaraq yumruq atdı. Və hər şey bir anın içində oldu. Azərin qışqırtısını eşitdim. O mənə Sənanın əlində bıçaq olduğunu qışqıraraq dedi. Bıçaqla döş qəfəsimə vurdu. Mən də ona yumruq vurdum və o zərbədən yerə yıxıldı. Digəri isə qolumdan tutmuşdu. Əgər mən onu vurmasaydım o məni dəlik-deşik edəcəkdi. Bu zaman mən tək idim. Çünki Emin bizi qorumaq üçün dəmir gətirməyə getmişdi. Azər isə orada yox idi. Divara tərəf çəkildim. Bu zaman Emin dəmirlə gəldi və onlar bunu görən kimi zaldan qaçdılar.
- Bəs Azərin vurulmasından nə zaman xəbər tutdunuz?
- Biz artıq içəri girdik və bu zaman Azəri gördüm. Azər mənə yaxınlaşıb “deyəsən məni ürəyimdən vurdular” dedi. Maykasını qaldırıb baxdıq. Gördüm ki, iki zərbə qoltuğunun altına dəyib. Elə bu zaman huşunu itirib yerə yıxıldı. Biz naşatır turşusu ilə onu ayıltmağa çalışdıq. Ayıltdıq da. Özünə gəlib bizə baxdı, sonra yenə huşunu itirdi. Bir də oyada bilmədik.
- Təcili tibbi yardıma zəng vurmuşdunuz?
- Bəli, artıq zəng vurulmuşdu. Onlar da gəlib bir xeyli Azəri oyatmaq üçün cəhd göstərdilər. Amma, alınmadı.
- Bəs son söz olaraq nə demək istərdiniz?
- Son olaraq onu deyə bilərəm ki, mən bu hadisənin baş verməməsi üçün çalışdım. Mən müəlliməm və hər zaman danışıq yolu ilə insanları başa salmağa çalışıram. Onların ikisinin də idmançı olmadıqları, təsadüfən zala gəldikləri ilk görünüşdən bəlli idi. Amma o da aydın idi ki, onlar dalaşmaq istəyirdilər. Məqsədləri ora gəlib bu cinayəti törətmək idi.
Milli.Az
Soldakı mərhum Azər Məmmədov, sağdakı yaralanan müəllim Ruslan Əfəndiyev
Hadisənin baş verdiyi idman zalı
Hadisəni törədən şəxs Sənan Quliyev
