Dünyada 100 milyonlarla insanın koronavirus pandemiyasına görə evdən işlədiyi və ünsiyyət saxladığı bir vaxtda video kommunikasiya xidmətlərinin populyarlığı kəskin artıb. Xidmətlərdən bir çoxu, məsələn, “Zoom” və ya “Skype” bir konfransa 10 və daha çox istifadəçi qoşmağa imkan verir.
“ICTnews” Elektron Xəbər Xidməti “vesti.ru” saytına istinadən yazır ki, bu arada “WhatsApp”da qrup videozəngləri üçün 4 istifadəçi limiti rəqiblərinə uduzur. “WABetaInfo” nəşrinin məlumatına görə, “Facebook”a məxsus messencer bu problemi yaxın günlərdə aradan qaldırmağa çalışır.
Messencerin son beta-versiyasında videoçat iştirakçılarının limiti iki dəfə (8-dək istifadəçi) artırılıb.
Hazırda yenilik artıq “WhatsApp” messencerinin “iOS” və “Android” əməliyyat sistemləri üçün beta-versiyalarında əlçatandır.
Emil Hüseynov
