Gəminin kapitanı: “Ekipaj üzvləri bir dilim çörək üstündə bir-birinə bıçaqla hücum edirdi”

Somali sahillərində 60 gün əvvəl taleyin ümidinə buraxılan Panama bayraqlı “Mustafa Bəy” gəmisinin 4-cü kapitanı Əhməd Şur və üç yoldaşı filmlərə bənzər bir macəra ilə xilas olub.

Lent.az-ın Türkiyə mətbuatına istinadən məlumatına görə, Pakistandan Cibutiyə sement daşıyan 144 metrlik quru yük gəmisi “Mustafa Bəy”in aid olduğu firma ilə liman yetkililəri arasındakı maliyyə anlaşmazlığı yaranıb. Nəticədə gəmi Somali yaxınlığında lövbər salıb.

Bundan sonra gəmidə olanların həyat şəraiti çətinləşib. Hətta iş o yerə çatıb ki, limana yaxınlaşmasına icazə verilməyən gəminin birinci kapitanı ilə aşpaz yemək üstündə bir-birlərinə bıçaqla hücum ediblər.

5-i Türkiyə, 2-si Azərbaycan, 12-si Pakistan vətəndaşı olan ekipaj üzvləri günlərlə ac və susuz qalıblar və onlar duruma etiraz ediblər. Bundan sonra şirkətin təmsilçiləri Cibuti polisinə gəminin Somalidə girov götürüldüyünü bildiriblər. Gəminin xilas edilməsi üçün əməliyyat keçirən polislər “Mustafa Bəy”ə yaxınlaşanda dəhşətə gəliblər. Məlum olub ki, gəmin girov götürülməyib, sadəcə, taleyin ümidinə tərk edilib. Nəticədə ekipaj üzvlərindən Əhməd Şur, Əli Əmrah İnan, Xaqan Minarəçi və Çingiz Sarı başqa bir türk gəmisi ilə ailələrinin yanına qayıdıblar.

Əhməd Şur başına gələn hadisələrin filmlərə bənzədiyini deyib: “İndiyədək çətin anlarımız olmuşdu, amma bu 60 gündə həyatımın ən dözülməz günlərini yaşadım. Gəmidə ocaq yandırıb, çörək bişirirdik, dənizdən balıq tuturduq. Yeməklər paylanırkən bir dilim çörək üstündə dava düşürdü, ekipaj üzvləri bir-birinə bıçaqla hücum edirdi”.

Əhməd Şur digər ekipaj üzvlərinin gəmidə qaldığını deyib. Onlardan Türkiyə vətəndaşıdır ki, ağır xəstədir, qalanları isə Azərbaycan və Pakistan vətəndaşlarıdır.