Gizli müharibə TAPŞIRIĞI, Dağlıq Qarabağ AZƏRBAYCANA… - GÜNÜN SİYASİ XÜLASƏSİ

Paylaş

Azərbaycanın işğal edilmiş Dağlıq Qarabağ bölgəsində yaradılan qondarma rejimin “prezidenti” Bako Saakyan və “müdafiə naziri” Levon Mnasakyan təmas xəttindəki postlara gəlib. Qondarma rejimin “rəhbərliyi” müdafiə xəttinin gücləndirilməsi tapşırığını verib.

Qeyd edək ki, bir gün öncə Qarabağdakı erməni ordusu hazır vəziyyətə gətirilib. İrəvanda baş verən daxili gərginlik fonunda atılan bu addım işğalçı ölkənin cəbhədə təxribat törədə biləcəyi ehtimalını gündəmə gətirib. Saakyanın erməni əsgərlərin olduğu döyüş postlarına gəlməsi də cəbhədə gizli nələrinsə planlaşdırıldığı versiyasını gücləndirir.

Ermənistanda hakim Respublika Partiyasının siyasi qanadı mayın 8-də keçiriləcək baş nazir seçkilərində Nikol Paşinyanın əleyhinə səs verəcək. Bu barədə “Joxovurd” qəzeti yazıb.

Lakin qəzet qeyd edir ki, Respublika Partiyasının fraksiyası ümumilikdə Paşinyanın xeyrinə səs verəcək.

“Milli azıqların nümayəndələri Arsen Mixaylov və Knyaz Həsənov Paşinyanı dəstəkləyəcək. Həmçinin, generallar da Paşinyana səs verəcəklər. Misal üçün, Seyran Saroyan artıq mövqeyini açıqlayıb. Bununla yanaşı, bir neçə biznesmen də 8 may seçkisində Paşinyana səs verəcək”, - deyə qəzet yazıb.

Ermənistandakı hakimiyyət dəyişikliyi ağır nəticələrə səbəb ola bilər. Bu barədə bəyanatı Rusiya Liberal Demokrat Partiyasının sədri Vladimir Jirinovski yayıb.

“Heç kim zəmanət vermir ki, erməni xalqının həyatı yeni hakimiyyətin dönəmində daha yaxşı olacaq. Ermənistan hakimiyyətindəki adamlar da sadə vətəndaşdırlar və onların da çatışmazlığı mövcuddur. Bu gün Ermənistanda baş verənlər dövlət çevrilişidir. Ermənilər indiki hakimiyyəti devirməklə daha pis hökumət əldə edəcəklər”, - o bildirib.

Türkiyədə ölkənin əsas müxalifət partiyası olan Cümhuriyyət Xalq Partiyası (CHP) prezident postuna namizədinin adını açıqlayıb. Namizədin adı may ayının 4-də CHP-nin qapalı keçirilən toplantısında qərarlaşdırılıb. Yekdilliklə Muharrem İncinin prezidentliyə namizəd olacağı elan edilib.

Xatırladaq ki, Ədalət və İnkişaf Partiyasından fəaliyətdə olan prezident Rəcəb Tayyib Ərdoğan, İYİ Partiyadan Meral Akşener, “Səadət” Partiyasından Temel Karamollaoğlu, Xalqların Demokratik Partiyasından isə Selahattin Demirtaşın prezidentliyə namizədliyi irəli sürülüb. Milliyyətçi Hərəkat və Böyük Birlik partiyaları isə R.T.Ərdoğanın namizədliyini dəstəkləyəcəkləri barədə qərar qəbul ediblər.

Xatırladaq ki, iyunun 24-də Türkiyədə növbədənkənar prezident və parlament seçkilərinə namizədlərin irəli sürülməsi mayın 9-dan başa çatacaq.

Afrindəki təmizlik hərəkatı yüz faiz bitmiş deyil. İdlib və Tel Rıfatla bağlı proseslər davam edir. Bu sözləri Türkiyə Prezidenti Rəcəb Tayyib Ərdoğan deyib.

“XİN rəhbərimizin ABŞ-a səfəri olacaq. O səfər zamanı ABŞ Dövlət katibi Mayk Pompeo ilə Menbiç barədə danışacaqlar. Bizlər Menbiçin YPG və PYD-dən təmizlənməsinə hesablanmış addımlar atılmasına ümid edirik”, - Ərdoğan bildirib.

Suriyada və İraqda 5 minə yaxın ABŞ hərbçisi var. Bu barədə Pentaqonun mətbuat katibi Dana Uayt bildirib.

D.Uayt deyib: "Suriyada və İraqda bizim sayımız 5 minə yaxınndır. Bu rəqəm təxminidir". Mərbuat katibi hər ölkədə olan hərbçilərin sayını açıqlamaqdan imtina edib.

Qeyd edək ki, ABŞ İraqd və Suriyada İŞİD terror qruplaşmasına qarşı mübarizə aparır.

Suriya ordusu paytaxt Şam şəhəri yaxınlığında yerləşən Yermük düşərgəsinin terrorçulardan azad edilməsi üçün əməliyyata başlayıb. Bu barədə Rusiya Müdafiə Nazirliyinin rəsmi nümayəndəsi İqor Konaşenkov danışıb.

ABŞ prezidenti Donald Trampın İranla nüvə sazişi haqda qərarını açıqlayacağı tarix yaxınlaşdıqca, Tehrana qarşı təzyiqlər artır. İsrailin baş naziri Binyamin Netanyahunun İrana aid nüvə dosyalarını ələ keçirdiklərini iddia etməsindən sonra hədəfə alınan Tehrana qarşı diplomatik hücum başlanıb.

İran mühasirəyə alındı: İsrail HÜCUMA HAZIRLAŞIR

İranın nüvə razılaşması ilə bağlı bütün problemlər “Altılıq” ölkələri və İran arasında müzakirə edilməlidir. Bunu jurnalistlərə açıqlamasında Rusiya Xarici İşlər Nazirliyinin nümayəndəsi Mariya Zaxarova deyib. Onun sözlərinə görə, İran hazırda MAQATE tərəfindən dünyada ən yaxşı yoxlanılan ölkədir.

Zaxarova İranın nüvə fəaliyyətinin hərbi mahiyyət daşımadığını bildirib.

Qeyd edək ki, bundan öncə İsrail İranın nüvə fəaliyyətinin hərbi xarakter daşıdığı və İranın nüvə fəaliyyətləri bağlı arxivi ələ keçirdiyini bəyan etmiş, İsrailin Rusiyaya qarşı sanksiyalarda yer almadığını xatırladaraq, Moskvadan Təl-Əvivin narahatlığını başa düşməsini xahiş etmişdi.

ABŞ-ın Cibutidəki hərbi bazasından havaya qalxan təyyarələr Çinə məxsus bazalardan lazer hücumuna məruz qalıb. Bu barədə ABŞ Müafiə Nazirliyinin sözçüsü Dana Uayt məlumat verib.

Sözçü bildirib ki, təyyarələrə Çin bazalarından lazer cihazları ilə müdaxilə edilir və buna görə ABŞ Çinə nota göndərib: “Gerçək bir təhdid. Bunlar çox ciddi hadisələrdir. İki nəfər yaralanıb. Rəsmi olaraq Çin hökumətinə nota göndərmişik və çinlilərin bu olayları araşdırmasını tələb etmişik”.

Qeyd edək ki, Çinin ölkə xaricində ilk hərbi bazası olan Cibutidəki bazası ötən ilin avqust ayında açılıb. ABŞ isə Çinin Cibutidəki hərbi bazaları yaxınlığında yeni baza açmasını onlar üçün ciddi problem hesab etməyib. Cibuti Çin və ABŞ-la yanaşı, Yaponiya və Fransa hərbi bazalarına ev sahibliyi edir.

Şimali Koreya lideri Kim Çen İnlə görüş yeri və vaxtı bəlli olub. Bu sözləri ABŞ Prezidenti Donald Tramp deyib.

O bildirib ki, mövzu bağlı təfərrüatlar yaxın zamanda açıqlanacaq.

Ömər Dağlı