Bakı, 16 yanvar, AzərTAc
Azərbaycan Milli Elmlər Akademiyasının (AMEA) Aşqarlar Kimyası İnstitutunun alimləri materialların keyfiyyət göstəricilərini yaxşılaşdıran və istismar müddətini uzadan kimyəvi maddələrin məqsədyönlü sintezinin optimal yollarını işləyib hazırlayıblar.
AMEA-dan AzərTAc-a bildiriblər ki, institutun direktoru, akademik Vaqif Fərzəliyevin sözlərinə görə, akilfenol, salisil turşusu, formaldehid və monoetanolaminin birgə kondensləşmə məhsulunun karbonatlaşmış kalsium duzu olan, motor yağlarının yuyucu-dispersləşdirici, korroziyaya və oksidləşməyə qarşı xassələrini yaxşılaşdıran çoxfunksiyalı aşqar (AKİ-172) sintez edilib. İnstitutun direktoru bildirib ki, sintez edilmiş aşqar funksional xassələrinə görə mövcud əmtəə aşqarlarından üstündür və onun tətbiqi ilə hazırlanmış M-10Г2 motor yağı bütün tələblərə cavab verir, “Shell” şirkətinin analoqu ilə eyni səviyyədədir. Digər mühüm elmi nəticə texnikanın normal və etibarlı işləməsini təmin edən yeni sürtkü materialları, yağlayıcı-soyuducu mayelər və ekoloji təmiz yanacaq kompozisiyalarının yaradılmasıdır. Yüksək damcı-düşmə temperaturuna, kolloid stabilliyə və triboloji xassələrə malik, tərkibində nanoölçülü Cu, Ti və onların oksidləri olan yeni sürtkü işlənib hazırlanıb. Yaradılmış yeni sürtkü istismar xassələrinə görə, Armatol-238, R-412 və Litol-24 sənaye sürtkülərindən xeyli üstündür.
