Elmira Axundova: “Prezidentə yaxınlaşıb soruşdum ki, bunun sirri nədir?” – MÜSAHİBƏ (II HİSSƏ)

Paylaş

- İlham Əliyevin yumoru sevdiyini deyirsiniz. Heydər Əliyevdə də yumor güclü idi.

- Yəqin ki, bu, ona atasından irsi olaraq keçib.

- Eyni yumor idimi? Çünki Heydər Əliyevin yumoru daha çox satirik idi.

- İlham Əliyevin yumoru daha müasirdir. O, lətifə danışmağı sevir. Heydər Əliyev də lətifələri sevərdi. Amma İlham Əliyevin yumoru daha başqadır.

- Adətən insanın liderlik xüsusiyyətləri gəncliyində hiss olunur. İlham Əliyevdə bu necə görünürdü?

- Heydər Əliyev kimi İlham Əliyevdə də gəncliyindən liderlik xüsusiyyətləri bilinirdi. Deyirlər ki, həm məktəbdə, həm də universitetdə özünü lider kimi aparırdı. Həmişə də boy-buxunu, yaxşı bilikləri, xarici dil bilməyi ilə seçilirdi. Lakin universitetdə digərlərindən seçilməməyə çalışırdı. Çünki bilirdi ki, hansı ailədə böyüyüb, kimin oğludur. Belə insanlar adətən özlərini sadə aparmağa çalışırlar. Kitabda da yazmışam ki, “belə atanın oğlu olmaq şərəfdir, amma həm də böyük məsuliyyətdir”. İlham Əliyev bu məsuliyyəti hiss edirdi. Adi gülərüz oğlan idi. O, heç vaxt böyük siyasət haqqında düşünmürdü, bəlkə də heç siyasətə gəlmək istəmirdi. Onu tale və tarix bura gətirdi.

- Başqa yolu seçə bilərdimi?

- Mənə elə gəlir ki, o, böyük siyasətə can atmırdı. İstəmirdi ki, prezident olsun. Bəlkə də bir qədər könülsüz siyasətə gəldi. Yalnız atasına və dövlətinə hörmət etdiyi üçün bunu etdi, həm də anlayırdı ki, Heydər Əliyevin layihələrini başa çatdırmaq lazımdır. Həmin vaxt çətin zamanlar idi, başa düşürdü ki, çiyinlərinə ağır yükü götürməlidir.

- Və buna nail oldu.

- Əlbəttə. Kitabda da Azərbaycanın 10 il ərzində necə dəyişdiyini göstərmişəm. Başqalarının – amerikalıların, ingilislərin, rusların Azərbaycan haqqında söylədikləri fikirlərdən sitatlar gətirmişəm. Bizdə hərdən yaxşı şeyləri görmürlər. Gərək, bunu başqaları desin, sonra onun dəyərini anlayaq. Amma bütün bunları görməmək mümkün deyil. Belə bir bina - Milli Məclisin foyesindən görünən “Alov Qüllələri”ni göstərir - dünyanın heç bir yerində yoxdur. Bakı möcüzə şəhərinə çevrilib. Rayonlarımız da inkişaf edir. Təbii ki, problemlərimiz də çoxdur. Amma bu inkişafın problemləridir və daim onların aradan qaldırılması üçün iş aparılır. Hər şey tamamilə bizdən asılı deyil. Dünyada böhran var, Azərbaycan müharibə şəraitində yaşayır, qaçqın və məcburi köçkünləri var. Bunlara kifayət qədər xərc çəkilir. Biz daim müdafiə üçün pullar xərcləyirik. Bunlar olmasaydı, ölkəmiz 10 dəfə artıq inkişaf edərdi. Fikrimcə, yolumuz doğru yoldur və bizim güclü rəhbərimiz var. Əsas olan budur.

- “Həyat ona həmişə yaxşı olmadı” deyə yazırsınız. Heydər Əliyevin oğlu olan bir insan üçün hansı çətinliklər ola bilərdi?

- Heydər Əliyev Siyasi Bürodan çıxarılır, haqqında Qorbaçovun təlimatı ilə qəzetlər tənqidlər yazırlar. Onu damğalamağa çalışırlar. Sonra Azərbaycana gəlirlər və parlamentdə Heydər Əliyevə hücumlar başlayır. Mən bunları öz gözlərimlə görmüşəm. Sən o vaxt bəlkə də dünyada yox idin – bizim nəslin təzə ayaq açıb yeriməyə başladığı dövrdən danışır – mən bura (Milli Məclisə) gəlirdim. Heydər Əliyev bax orada dayanırdı - əli ilə giriş qapısının qarşısındakı yeri göstərir – onun yanına heç kim getmirdi. Qorxurdular. Kişi orada tək dayanardı və baxardı. İlham Əliyevi universitetdən çıxartdılar. İşsiz qaldı. Kim olsaydı sınardı. Böyük insanların oğulları çətinliyə düşən kimi içkiyə qurşanır, kimisi sınır, kimisi tüfeyli həyat sürür. Ruslardan neçə-neçə belə insan tanıyıram. İlham Əliyev bütün bunları seçmədi, o, ayaqda qaldı və bizneslə məşğul olmağa başladı. Moskvada ilk trikataş fabrikini o açıb. Bu kiçik biznesi ilə bizim Moskvadakı diasporumuzu da saxlayırdı.

- Bunu bizim nəsil xatırlamır, ya da ümumiyyətlə bilmir.

- Biz Moskvada Azərbaycan ocağı yaratmışdıq. Sədri Tofiq Məlikli idi. Erməni işğalına qarşı aksiyalar keçirir, etiraz kampaniyaları təşkil edirdi. İlham Əliyev tədbirlərimizdə həmişə iştirak edirdi və bizə daim maddi dəstək verirdi. Kiçik biznesi ilə ailəsini və diasporumuzu saxlayırdı. Bütün bunları bilmək lazımdır. Bizim prezidentimiz siyasətlə yanaşı, biznesi, idmanı və digər sahələri gözəl bilir. 2008-ci il dünyadakı maliyyə böhranı Azərbaycana təsir etmədi. Hətta Rusiya kimi nəhəng ölkənin iqtisadiyyatı çökmüşdü. Tədbirlərin birində Prezidentə yaxınlaşaraq soruşdum: “Cənab prezident, hamı sizə valeh olur və hər kəsi bir sual düşündürür: Azərbaycan bu maliyyə böhranından neçə çıxdı? Rusiya kimi nəhəng dövlət isə aşağıya doğru yuvarlandı. Bunun sirri nədir?”. Güldü və dedi: “Elmira, işləmək lazımdır. Biz gecə-gündüz işləyirik. Resept sadədir”.

Gənclər bunları az bilir, ya da az öyrənir. İnşallah, kitabı Azərbaycan dilinə tərcümə edəcəyik. Həmçinin, ikinci hissəsi daha geniş olacaq. Gənclərimiz bunları oxuyub-öyrənməlidir. Prezidentin siyasətini, cəsarətini, həyatını bilməlidir. Ən qiymətli olan bilirsənmi nədir? – sual verir və davam edir – O, Azərbaycanı dünyalar qədər sevir və heç vaxt, hətta ölüm belə olarsa, milli maraqlarımızı heç nəyə qurban verməyəcək. Yadımdadır, 2009-cu ildə İstanbul sammitinə getmədi. Obama onunla görüşmək istəyirdi. Hillari Klinton belə zəng edərək, xahiş etmişdi. Həmin vaxt Obama yeni seçilmişdi, çoxları onunla görüşə can atırdı. İlham Əliyev isə getmədi.

- Qarabağ məsələsinə görə.

Bəli. Milli maraqlarımızı heç nəyə qurban vermədi. Barak Obama o sammitdən sonra dəyişdi.

- Belə çıxır ki, Obama Azərbaycan prezidenti ilə şəxsi intriqa aparırdı?

- Belə görünür. Amma Obama tarixdə heç nəyi ilə qalmayacaq.

- Azərbaycan lideri ailə başçısı obrazında necə görünür?

- Gözəl ailələri var. Qızlarını da tanıyıram. Çox layihələr həyata keçirirlər. Zaman-zaman onların layihələrini işıqlandırıram. Belə ailə ilə ancaq fəxr etmək olar. Cənab prezident bir dəfə dedi ki, “mənim üçün əsas ailədir”. Başqalarının hobbiləri var. Biri ova, digəri başqa şeyə maraq göstərir. O isə ailəsinin yanında dincəlir, istirahət edir. Özü də deyir ki, “ailəmin yanında olanda özümü xoşbəxt hiss edirəm”. Ailəsiz, övladsız lider yaxşı ola bilməz. Gərək, birini sevəsən, övladın nə olduğunu biləsən ki, ölkəni də övladın kimi sevə biləsən. O, əsil ata və ailə başçısıdır. Xoşbəxt ailəsi var. Hesab edirəm ki, uğurun 50 faizi də budur. Əgər sənin arxanda xoşbəxt ailən dayanırsa, Mehriban xanım kimi cəsarətli xanım varsa, əl-ələ verib onunla cəbhəyə qədər gedirlərsə, bu, uğurun yarısı deməkdir.

Asif Nərimanlı