Azərbaycan Dağlıq Qarabağ separatçılarının liderinin
ABŞ-a səfəri ilə əlaqədar bu ölkəyə nota verib. Azərbaycan Ordusu
genişmiqyaslı hərbi təlimlər keçirib. "Zeytun Budağı" hərəkatı
çərçivəsində 3-cü mərhələ - Afrin şəhərinin mühasirəsi başlayıb.
Şərqi Aralıq dənizində Türkiyə və Yunanıstan ilə Cənubi Kipr
arasındakı gərginlik Egey dənizinə keçib. ABŞ-ın dövlət katibi Reks
Tillerson istefaya göndərilib. ABŞ prezidenti Donald Tramp bütün
dünyaya meydan oxuyan “müharibə sənədləri”nə paralel olaraq bir
“müharibə kabineti” qurur. Britaniya Rusiya Baş Kəşfiyyat
İdarəsinin keçmiş əməkdaşı Sergey Skripalın zəhərlənməsi Rusiyaya
yeni hücumlara gətirib çıxarıb. ABŞ Avropadakı daimi hərbi
kontingentinin sayını artırmaq niyyətindədir.
Azərbaycan, Dağlıq Qarabağ
12-17 mart tarixlərində Azərbaycan Ordusu
genişmiqyaslı hərbi təlimlər keçirib. Ali Baş
Komandan İlham Əliyevin təsdiqlədiyi plana əsasən keçirilən
təlimlərdə 25.000 nəfərədək şəxsi heyət, 250-dək tank və digər
zirehli texnika, 1000-dək müxtəlif çaplı raket və artilleriya
qurğusu, reaktiv yaylım atəş sistemi və minaatan, 50-dək müxtəlif
təyinatlı ordu və cəbhə aviasiyası cəlb olunub.
Erməni siyasi şərhçi Sarqis Artsruni yazır ki, Azərbaycan
Ordusunun təlimlərə başlaması Bakının mövcud status-kvo ilə
barışmayacağını və yaxın zamanlarda ərazilərin azad olunması üçün
hərəkətə keçəcəyini göstərir.
Ordumuz 25 min əsgərlə hərəkətə keçdi - İrəvanı qorxuya salan İKİNCİ APREL PLANI
Azərbaycanın işğal olunmuş ərazilərində yaradılmış
qondarma rejimin “prezidenti” kimi özünü təqdim edən Bako Saakyanın
ABŞ-a səfəri və ABŞ Konqresinin inzibati binasında qondarma rejimi
təbliğ edən tədbir keçirməsi ilə əlaqədar ABŞ-ın Azərbaycandakı
səfiri Robert Sekuta XİN-nə çağırılıb, Azərbaycan Respublikası
Xarici İşlər Nazirliyinin ABŞ Dövlət Departamentinə ünvanlandığı
etiraz notası ona təqdim edilib. Həmçinin, Azərbaycan
Respublikasının ABŞ-dakı səfiri Dövlət Departamentində görüş
keçirərək Azərbaycanın etirazını ABŞ tərəfinə çatdırıb.
"ABŞ-ın mövqeyi dəyişməyib. ABŞ digər ölkələr, o
cümlədən Ermənistan da daxil olmaqla de-fakto Dağlıq Qarabağ
rejimini tanımır". Bu barədə ABŞ-ın Azərbaycandakı
səfirliyinin səfir Robert Sekutanın XİN-ə çağrılması və ona etriaz
notasının təqdim olunması ilə bağlı məlumatında bildirilib.
XİN-in notasına CAVAB: “ABŞ Dağlıq Qarabağ rejimini tanımır”
Ermənistan və Azərbaycan 2016-2017-ci illər ərzində
675 milyon dollarlıq silah alıb. Bu barədə informasiya Stokholm
Sülh Problemləri Tədqiqatı İnstitutunun hesabatında yer
alıb. Hesabata əsasən Azərbaycan silah idxalına görə
dünyada 27-ci yerdə qərarlaşıb. İki il ərzində Azərbaycan 551
milyon dollar silah alıb.
Ermənistana gəlincə isə o, 54-cü yeri tutub. Onun iki il ərzində
idxal etdiyi silah 124 milyon dollar həcmində olub.
SİPRİ İrəvana idxalatın hamısını Rusiyanın həyata keçirdiyini
bildirib. İki il ərzində Ermənistan 6 ədəd "Smerç" reaktiv atəş
sistemi, 200 ədəd "Verba" daşına bilən zenit raket kompleksi və
"Kornet 9M133" tank əleyhinə raket kompleksləri alıb.
Azərbaycana isə əsas silah tədarükçüsü Rusiya və İsrail olub.
2017-ci ildə Azərbaycan İsraildən 4 ədəd OPV-62 döyüş gəmisi, 40
ədəd "Orbiter" pilotsuz uçan aparat, 215 ədəd "Spayk NLOS" tank
əleyhinə raketini alıb. Rusiyadan 36 ədəd TOS-1A Solntsepek
sistemi, 40 ədəd BTR-82A zirehli transportyoru, 800 ədəd
"Xrizantema" tank əleyhinə raket kompleksi idxal edib.
Azərbaycan keçən il həm də Slovakiya və Çexiyadan silah alıb.
Belə ki, Bakı Bratislavadan 18 ədəd 152 mm-lik özüyeriyən "Dana"
haubitsaları, Praqadan isə 10 ədəd 122 mm-lik RM-70 reaktiv səyyar
atəş sistemləri əldə edib.
Türkiyə, İran, Yaxın Şərq
Türkiyə və Rusiya Yüksək Səviyyəli Əməkdaşlıq Şurası
aprelin 3-ü Ankarada keçiriləcək. Bunu Türkiyənin
xarici işlər naziri Mövlud Çavuşoğlu martın 14-də Moskvada rusiyalı
həmkarı Sergey Lavrovla görüşü zamanı deyib.
Əməkdaşlıq Şurası Türkiyə Prezidenti Rəcəb Tayyib Ərdoğan və
Rusiya Prezidenti Vladimir Putinin iştirakı ilə keçiriləcək. Görüş
zamanı ikitərəfli münasibətlərin inkişafı ilə yanaşı, regional
məsələlərin həllində əməkdaşlığın genişləndirilməsi də müzakirə
mövzusu olacaq.
Moskva Türkiyənin S-400 zenit-raket kompleksinin
çatdırılmasının sürətləndirilməsi üzrə Ankaranın xahişlərinə müsbət
reaksiya verib. Bunu Türkiyənin Xarici İşlər
Nazirliyinin başçısı Mövlud Çavuşoğlu ilə Moskvada keçirilən
danışıqların nəticəsinə görə Rusiyanın xarici işlər naziri Sergey
Lavrov bildirib.
Onun sözlərinə görə, S-400-lərin Türkiyəyə çatdırılmasını
hazırda mütəxəssislər müzakirə edirlər.
Türkiyə ilə ABŞ arasında Münbiç məsələsində razılıq
əldə edilsə də, ABŞ-ın dövlət katibi Reks Tillersonun istefaya
göndərilməsi razılığın reallaşmasını sual altına
qoyub. Türkiyənin Xarici İşlər Nazirliyinin başçısı
Mövlud Çavuşoğlu sözlərinə görə, martın 19-da “Yol xəritəsi”
müəyyən olunmalı idi.
Qeyd edək ki, martın 13-də Reks Tillerson prezident Donald Tramp
tərəfindən istefaya göndərilib.
Avropa Parlamenti Türkiyənin Afrin əməliyyatlarını
dayandırması ilə bağlı qanun layihəsini Strasburqda müzakirəyə
çıxaracaq. Bu barədə “Hürriyyət” qəzeti məlumat
yayıb.
AP-nin qanun layihəsində Türkiyənin Suriyada apardığı
əməliyyatların ABŞ-la münasibətlərinə zərbə vurduğu, tərəflər
arasında gərginlik yaratdığı qeyd edilib.
"Suriyadakı ABŞ-ın hərbi bazaları niyə quruldu. Hər
halda Rusiyaya görə deyil". Bunu ölkə prezidenti
Rəcəb Tayyib Ərdoğan bildirib.
"Suriyada 20 hərbi baza quruldu. Niyə quruldu? İlk ağla gələn
İran və Türkiyədir. Hər halda, Rusiya deyil. Bu, üçüncü dünya
müharibəsi anlamına gəlir. Hər şeyə hazır olmalıyıq", - o
bildirib.
“Bizim dərdimiz işğal deyil. Bizim dərdimiz terror koridorunu
şərqindən qərbinə qədər terrorçulardan təmizləməkdir. Bizim bu
bölgə ilə sərhədimiz var. Amerikanın varmı? Rusiya rejimlə birgə
hərəkət edir. Koalisiya qüvvələri kiminlə hərəkət edir? Tillersona
(ABŞ-ın keşmiş xarici işlər naziri – red.) özəlliklə məlumat
verdim. Bu silahları buraya niyə gətirirsiniz? dedim. Heç bir səs
yoxdur” – Ərdoğan bildirib.
“İncirlik Türkiyənin bazasıdır, bu, NATO-nun bazası
deyil və amerikalıların orada olması türk xalqının iradəsindən
asılıdır”. Bunu Moskva Dövlət Beynəlxalq Münasibətlər
İnstitutunun (MDBMİ) tələbələriylə görüş zamanı Türkiyənin Xarici
İşlər Nazirliyinin başçısı Mövlud Çavuşoğlu deyib.
Çavuşoğlu Moskvadan ABŞ-ı hədələdi: “Güləni bizə verməsəniz…”
Şimali İraqda PKK terror təşkilatına qarşı birgə
keçirilməsi planlaşdırılan əməliyyatla bağlı Ankara və Bağdad
arasında aparılan danışıqların bəzi detalları məlum
olub. 7 aydır davam edən danışıqlarda Sincardakı 7 və
Mahmur bölgəsindəki bir düşərgəyə qarşı əməliyyatın keçirilməsi
qərarlaşdırılıb.
İyun ayında keçirilməsi planlaşdırılan əməliyyat iki ölkənin ilk
birgə əməliyyatı olacaq.
Yeni müharibənin tarixi açıqlandı - 7 aylıq danışıqların DETALLARI
Şərqi Aralıq dənizində Türkiyə və Yunanıstan ilə
Cənubi Kipr arasındakı gərginlik Egey dənizinə keçib.
Şərqi Aralıq dənizində istədiyini əldə edə bilməyən Yunanıstan yeni
və təhrikedici hücumu Egey dənizində etmək niyyətindədir.
Afina ötən həftə 6 mart-30 aprel tarixlərində Egey dənizində
real sursatlarla hərbi təlimlər keçirəcəyini açıqladı. Yunanıstanın
açıqlamasına görə, təlimlər üçün Çanaqqala boğazı, Çeşmə, Quşadası,
Fethiye və Kaşın qarşısındakı bölgələr seçilib. Beləliklə, Türkiyə
gəmilərinin beynəlxalq sulara çıxışı uzun müddət bağlanmış
olacaq
Türkiyənin beynəlxalq sulara çıxışı bağlandı – Qardaş ölkə yeni cəbhədə MÜHARİBƏYƏ BAŞLAYIR
PKK-nın alt qrupu olan TAK qruplaşmasının (Kürdüstan
Azadlıq Şahinləri) sui-qəsd dəstəsinin dəhşətli planı ortaya
çıxıb. Prokurorluq və Təhlükəsizlik Təşkilatının əldə
etdiyi məlumata görə, TAK-ın Mehmet Emin Töre, Gülşən Bahadır ve
Zozan Kutumun rəhbərlik etdiyi bir qrup prezident Rəcəb Tayyib
Ərdoğanın yaxın ətrafındakı adamlarına qarşı sui-qəsd
planlaşdırmışdı.
Məlumata görə, ələ keçirilən sui-qəsd qrupunun hədəfindəki adlar
prezident Ərdoğanın oğlanları Əhməd Burak Ərdoğan və Bilal Ərdoğan,
enerji və təbii qaynaqlar naziri olan kürəkəni Berat Albayrak,
digər kürəkəni Səlçuk Bayraktar və “Turkuvaz Media” İdarə Heyətinin
başçısı Sərhat Albayrak olub.
TAK qruplaşmasının Ərdoğanın ailəsinə qarşı dəhşətli SUİ-QƏSD planının ÜSTÜ AÇILDI - “SƏNƏD 5”-İN SİRRİ
Suriyanın paytaxtı Dəməşqin şəhərətrafında yerləşən
Şərq Quta bölgəsində xlor tərkibli kimyəvi maddə “An-Nüsra” Cəbhəsi
terror qruplaşmasının döyüşçüləri tərəfindən tətbiq
edilib. Bu haqda BMT Təhlükəsizlik Şurasının
iclasında Rusiyanın BMT-dəki daimi nümayəndəsi Vasiliy Nebenzya
bildirib.
Olun sözlərinə görə, terrorçular martın 5-də kimyəvi maddə
tətbiq ediblər və nəticədə 30 dinc sakin zərər çəkib. Rusiyalı
diplomat bildirib ki, bu, suveren Suriyaya qarşı birtərəfli güc
tətbiqinə əsaslar yaratmaq üçün edilir.
Moskva ABŞ-ın dəhşətli planını AÇIQLADI
Martın 16-da Qazaxıstanın paytaxtı Astanada bir
araya gələn Rusiyanın xarici işlər naziri Sergey Lavrov, onun
türkiyəli və iranlı həmkarları Mövlud Çavuşoğlu və Məhəmməd Zəriflə
birgə ortaq hesabat yayımlayıb. Hesabatda Suriyada
Astana müddəti çərçivəsində təşkil edilən “gərginliyi azaltma
bölgələri” tətbiqinin davam edilməsinə qərar verilib.
Açıqlamada “üç ölkə dörd gərginliyi azaltma bölgəsi haqqında
razılaşmanın tətbiqinə davam edilməsi qərarını verdi” ifadələri
işlədilib.
Əlavə olaraq, Astanada keçirilən görüşlərin 9-cu raundunun may
ayında keçirilməsinə qərar verilib.
Suriyada təşkil edilən dörd gərginliyi azaltma bölgəsi ilk
mərhələdə altı aylıq müvəqqəti bir tədbir kimi nəzərdə tutulmuşdu.
Bu bölgələrin sərhədləri boyunca təhülkəsizlik xətlərinin
qurulacağı, buradakı nəzarət məntəqələrində kimlərin dayanacağına
isə 3 ölkənin qərar verəcəyi bildirilirdi.
Britaniya, Almaniya və Fransa ABŞ Prezidenti Donald
Trampa İranla imzalanan nüvə razılaşmasına kosmetik dəyişikliklər
edilməsini təklif edib. Bu barədə informasiyanı
“Axios” saytı yayıb.
Avropa ölkələrinin məhz hansı dəyişiklikləri təklif etdiyi
açıqlanmayıb. Tramp Avropa liderlərinin bu təklifini qəbul etməyib
və sənədə ciddi dəyişikliklər edilməsini istəyib.
Qeyd edək ki, Tramp nüvə razılaşmasına dəyişikliklər
edilməyəcəyi təqdirdə ABŞ-ın bu müqavilədən çıxacağını
bildirib.
Martın 12-də ABŞ prezidenti Donald Tramp İrana qarşı
ballistik raketlərin hazırlanması, "beynəlxalq terrorçuluğa dəstək"
və insan haqlarının pozulması ilə əlaqədar tətbiq etdiyi
sanksiyaları daha bir il müddətinə uzatmaqla bağlı qərar qəbul
edib. Mətndə qeyd olunur ki, söhbət İranın nüvə
proqramı haqqında sazişin həyata keçirilməsindən sonra Tehranın
üzərindən götürülən sanksiyalardan getmir.
İsrail ordusu ölkə miqyasında “böyük müharibəyə
hazırlıq” çərçivəsində təlimlərə başlayıb. İsrailin
müdafiə naziri Aviqdor Liberman keçən ay verdiyi açıqlamasında
Livanın “Hizbullah” hərəkatı müharibəyə başlayarsa, İsrailin bütün
gücündən istifadə edəcəyini və quru qüvvələrinin Livana girəcəyini
bildirmişdi. O, bütün Beyrutun sığınacaqlarda olacağını
söyləmişdi.
Böyük müharibəyə HAZIRLIQ BAŞLADI – Açıq şəkildə elan ETDİLƏR
İran Yaxın Şərqdə dünyaya dominatlıq edəcək imperiya
qurmağa cəhd edir. Bunu “Foks Nyus” televiziyasına
müsahibəsində İsrail Baş naziri Benyamin Netanyahu deyib.
“İran aqressiv imperiya yaratmağa cəhd edir. Bu ölkə öz xalqını
respressiyalara məruz qoyur və Yaxın Şərqi ələ keçirərək, dünyaya
dominantlıq etmək istəyir. Qlobal terrorizmin sponsoru olan ölkə
nüvə silahı hazırlamağa cəhd edir. Bunun qarşısını almaq lazımdır”,
– deyə o bildirib.
“İran nüvə bombası hazırlayacağı halda, Səudiyyə
Ərəbistanı ən qısa müddətdə bu silahı əldə edəcək”.
Bunu Səudiyyə Ərəbistanının vəliəhd şahzadəsi Məhəmməd ibn Salman
CBS telekanalına müsahibəsində deyib.
“Səudiyyə Ərəbistanı nüvə bombası yaratmaq istəmir, amma əlbəttə
ki, əgər İran nüvə silahı hazırlayarsa, biz də bu silahı tezliklə
əldə edəcəyik”, - o bildirib.
İranı açıq şəkildə TƏHDİD ETDİ: “Nüvə silahını hazırlasa...”
ABŞ, Rusiya, Qərb-Rusiya münasibətləri
ABŞ prezidenti Donald Tramp martın 13-də dövlət
katibi Reks Tillersonu istefaya göndərib. Bu haqda
Tramp Tvitter səhifəsində bildirib.
“Mərkəzi Kəşfiyyat İdarəsinin direktoru Mayk Pompeo yeni dövlət
katibimiz olacaq. O, fantastik işlər görəcək. Reks Tillersona
xidmətlərinə görə təşəkkür edirəm”, - Tramp yazıb.
Pompeonu isə MKİ postunda Cin Xaspel əvəz edib.
“Tillersonla İranın nüvə məsələsində anlaşa bilmirdik”. Bunu ABŞ
prezidenti Donald Tramp dövlət katibi Reks Tillersonu vəzifəsindən
azad etməsi ilə bağlı qərarını şərh edəkən deyib.
ABŞ-ın Mərkəzi Kəşfiyyat İdarəsinin (MKİ) başçısı
Maykl Pompeo dövlət katibi postunda Reks Tillersonu əvəz edəcək.
Pompeonun sələfi Tillersonla müqayisədə daha çox siyasi təcrübəyə
malikdir. MKİ-nin keçmiş direktoru xarici siyasət
məsələlərində daha sərt mövqeyi ilə seçilir. Ekspertlərə görə, bu
təyinat ABŞ-ın aparıcı idarələrində mühafizəkar qanadı
gücləndirəcək.
Ekspertlərin yeni təyinatla bağlı heç də nikbin proqnozlar
vermirlər.
“Çay partiyası” və prezidentə ÖLÜM HÖKMÜ – "Dərin dövlət"ə məğlubiyyət BAĞIŞLANMADI
ABŞ prezidenti Donald Tramp bütün dünyaya meydan
oxuyan “müharibə sənədləri”nə paralel olaraq bir “müharibə
kabineti” qurur. İsrail tərəfdarı olan Maykl Pompeonu
Tillersonun əvəzinə dövlət katibi postuna gətirən Tramp neoconların
“şahin”i adlandırılan Con Boltona milli təhlükəsizlik üzrə
məsləhətçi vəzifəsi verəcək.
Nəşrin yazdığına görə, Dövlət Departamentinin rəhbərliyində
edilən dəyişiklik sərt kursun qarşıdakı dövrə damğa vuracağanı
göstərmiş oldu.
Rusiya ABŞ-ın və Qərb dünyasının yeganə müttəfiqi
sayılır və özünü əsl rəqibləri olan İran, Türkiyə və Çindən
qorumalıdır. Bu sözləri ABŞ Prezidenti Donald Trampın
keçmiş siyasi və strateji müşaviri Stiven Bennon deyib.
“Soyuq müharibə” dövründə ruslarla döyüşmüşəm. Mən sualtı
qayıqda zabit kimi çalışdım. Daha sonra Pentaqonda Rusiyanı
silahsızlaşdırmasında iştirak etdim. Mən ruslarla tanışam və mən
bilirəm ki, Rusiyanın iqtisadiyyatı İtaliyanın və Nyu York ştatının
iqtisadiyyatından zəifdir. Rusiya bizə təhlükə yaratmır. Əksinə, o
bizim yeganə müttəfiqimizdir”, - sabiq müşavir bildirib.
O bildirib ki, Kremlin əsas rəqibləri Pekində, Tehranda və
Ankaradadır:
“Krımın işğal edilməsindən dolayı narahat olmağa dəyməz. Əsas
diqqəti Böyük İpək yoluna, bu yolun birləşdirdiyi və keçmiş
savaşlardan çıxan Çin, Türkiyə və İran kimi böyük dövlətlərə
yönəltməliyik. Bu mədəniyyətlər bizim yəhudi-xristian kültürünə
yaddır”.
“Amerika generalları özlərinin güclü strateji sualtı
qayıqları haqqında lovğa-lovğa danışa bilərlər, amma zərbəni
vurmağa heç vaxt cürət etməyəcəklər”. Bunu ABŞ
Silahlı Qüvvələrinin Strateji Komandanlığının rəhbəri general Con
Haytenin bəyanatını şərh edən hərbi ekspert Viktor Litovkin “Ulduz”
telekanalına açıqlamasında deyib.
ABŞ Meksika və Kanada arasında kanala çevriləcək – Rusiyadan TƏHDİD
ABŞ-ın Dəməşqə endirəcəyi raket zərbəsi zamanı
Rusiya hərbçilərinə təhdid yaransa, Rusiya ona lazım olan cavabı
verəcək. Bunu Rusiya Silahlı Qüvvələrinin Baş
Qərargah rəisi Valeri Gerasimov söyləyib.
“ABŞ Dəməşqdə hökumət nəzarətində olan obyektlərə Bəşər Əsədin
öz rəqiblərinə qarşı kimyəvi silah tətbiq etməsini bəhanə gətirərək
zərbə endirmək istəyir. Bizim hərbçilərimizin həyatına təhdid
yaranacağı təqdirdə Rusiya ordusu bu raketlərə və onların
daşıyıcılarına qarşı lazımi tədbirlər görəcək”, – deyə o
bildirib.
“Rusiya Avropada Amerika güclərinin qarşılaşdığı
əsas təhlükədir”. Bunu NATO-nun Avropada Birləşmiş
Silahlı Qüvvələrinin baş komandanı Kertis Skaparotti “National
Interest” nəşrinə açıqlamasında deyib.
Onun sözlərinə görə, Rusiya tərəfi stabilliyi pozmağa davam edir
və İkinci Dünya müharibəsindən sonra Avropada sülhü təmin edən
beynəlxalq hüququn normalarına məhəl qoymur.
General təsdiq edib ki, Amerika hərbçiləri Avropa dövlətlərinin
Rusiyanın təcavüzündən müdafiəsi üzrə müxtəlif variantlar və hərbi
əks-təsir ssenarilərinin hazırlanması ilə məşğul olur.
Rusiya ilə müharibə ssenariləri hazırlanır – Amerikalı general SİRRİ AÇDI
Böyük Britaniya Rusiyanın Baş Kəşfiyyat İdarəsinin
(QRU) sabiq polkovnik Sergey Skripalın zəhərlənməsi işi üzrə
Rusiyadan iki gün ərzində izahatları gözləyir. Bu
haqda Britaniyanın baş naziri Tereza Mey Böyük Britaniya
parlamentinin İcmalar palatasında çıxışı zamanı bildirib.
Tereza Mey rəsmi Moskvanı Sergey Skripal və onun qızı Yuliyanın
zəhərlənməsində əli olmaqda ittiham edib.
“Artıq aydındır ki, cənab Skripal və onun qızı Rusiyada istehsal
edilən sinir iflicedici maddə ilə zəhərləniblər”, - baş nazir
bildirib.
Xatırladaq ki, martın 5-də Britaniya xüsusi xidmətlərinə
casusluqda günahlandırılan və hazırda İngiltərədə yaşayan Sergey
Skripal və onun qızı Solsberi şəhərində ticarət mərkəzində naməlum
maddədən zəhərlənərək xəstəxanaya yerləşdirilib.
Mey Rusiyaya ultimatum verdi: “İki gün ərzində…”
Böyük Britaniya Rusiyanın 23 diplomatını deportasiya
edəcək. Bu haqda Britaniyanın baş naziri Tereza Mey
bildirib. Qərar Böyük Britaniyanın xeyrinə casusluğa
görə daha əvvəl ittiham edilmiş Rusiyanın Baş Kəşfiyyat İdarəsinin
(QRU) sabiq polkovniki Sergey Skripal və onun qızının Londonda
naməlum maddəylə zəhərlənməsi ilə bağlıdır.
Britaniyadan Rusiya kəşfiyyatına ağır zərbə - YENİLƏNDİ
Böyük Britaniya Sergey Skripalın zəhərlənməsi işi
üzrə BMT Təhlükəsizlik Şurasının təcili toplantısını
çağırıb. Bu haqda Böyük Britaniyanın Xarici İşlər
Nazirliyinin xəbərində deyilir.
Britaniya Rusiya Baş Kəşfiyyat İdarəsinin keçmiş
əməkdaşı Sergey Skripalın zəhərlənməsinə cavab olaraq Rusiyanın
dövlət serverlərinə kiberhücum həyata keçirə bilər.
Bu barədə informasiyanı “Tayms” qəzeti yayıb. hazırda Britaniya
Müdafiə Nazirliyinin radioelektron kəşfiyyat üçün xüsusi proqram
təminatı yaratdığı bildirilib.
“Bu proqramın Kremlin kompüter şəbəkəsinə hücum üçün istifadə
ediləcəyi istisna edilmir. Bu, Skripalın zəhərlənməsinə əsas cavab
olacaq”, - xəbərdə bildirilir.
Qeyd edək ki, bundan öncə Britaniya Baş naziri Rusiyanı
Skripalın zəhərlənməsinə görə ittiham etmiş və iki gün ərzində
izahat verilməsini tələb etmişdi.
Rusiya Böyük Britaniyanın hərəkətlərinə cavab olaraq
ingilis diplomatlarını deportasiya edəcək. Bu haqda
Rusiyanın Xarici İşlər Nazirliyinin başçısı Sergey Lavrov
bildirib.
Xatırladaq ki, dünən parlamentdə çıxışı zamanı Britaniyanın baş
naziri Tereza Mey 23 Rusiya diplomatının deportasiya ediləcəyini
bildirib.
Rusiya Baş Kəşfiyyat İdarəsinin keçmiş əməkdaşı
Sergey Skripalın zəhərlənməsində Rusiyanın əlinin olmasıyla bağlı
danılmaz faktlara sahibik. Bunu BBC-yə müsahibəsində
Britaniya Xarici İşlər naziri Boris Conson söyləyib.
“Rusiyanın əlinin olmasıyla bağlı əldə etdiyimiz faktlar
danılmazdır. Rusiyanın bizə verdiyi cavab onun əsas günahkar
olmasını təsdiq edir”, – deyə o bildirib.
Onun sözlərinə görə, Britaniya ərazisində kimyəvi
silahdan istifadə etmək əmrini böyük ehtimalla Rusiya Prezidenti
Vladimir Putin verib. “İkinci Dünya müharibəsindən
bəri ilk dəfə olaraq İngiltərədə, Avropa küçəsində kimyəvi silahdan
istifadə olundu”, - Conson bildirib.
Böyük Britaniyanın xeyrinə casusluğa görə daha əvvəl
ittiham edilmiş Rusiyanın Baş Kəşfiyyat İdarəsinin (QRU) sabiq
polkovniki Sergey Skripal və onun qızının Londonda zəhərlənməsi
Fransa, Almaniya, ABŞ-ın və Böyük Britaniyanın təhlükəsizliyini
hədələyir. Bu haqda dörd ölkənin liderlərinin birgə
bəyanatında deyilir.
“Bu, bizim hamınız üçün təhlükədir. Biz - Fransa, Almaniya,
Birləşmiş Ştatlar və Böyük Britaniyanın liderləri Sergey Skripal və
onun qızına qarşı edilmiş hücumu pisləyirik”, - bəyanatın mətnində
deyilir.
Ölkə liderləri Rusiyanı Skripal işi üzrə yaranmış bütün suallara
cavab verməyə çağırıblar.
Xatırladaq ki, martın 5-də Britaniya xüsusi xidmətlərinə
casusluqda günahlandırılan və hazırda İngiltərədə yaşayan Sergey
Skripal və onun qızı Solsberi şəhərində ticarət mərkəzində naməlum
maddədən zəhərlənərək xəstəxanaya yerləşdirilib.
Dörd ölkə Rusiyaya qarşı birləşdi - BƏYANAT
Avropada hərbi Şengenin yaradılması NATO-nun
fəaliyyəti üçün yeni prioritet olub. Bunu “Krasnaya
Zvezda” qəzetinə müsahibəsində Rusiya Müdafiə nazirinin müavini
Aleksandr Fomin deyib.
“Avropanın artıq müəyyən yerlərində hərbi qrupların operativ
hərəkəti üçün müxtəlif silah ehtiyatı yaradılır. Əsas koordinasiya
mərkəzləri isə Polşa, Rumıniya, Macarıstan, Bolqarıstan, Slovakiya,
Litva, Latviya və Estoniya seçilib”, – deyə o bildirib.
Koreya böhranı
Koreya Xalq Demokratik Respublikasının (KXDR) lideri
Kim Çen In ABŞ-la sülh müqaviləsini imzalamaq və iki ölkə arasında
diplomatik münasibətləri qurmaq arzusunu ifadə edib.
Bu haqda Cənubi Koreya prezidentinin administrasiyasındakı yüksək
vəzifəli mənbəyə istinadən yerli “Tina İlbo” qəzeti bildirib.
Nəşrin həmsöhbətinin sözlərinə görə, dövlət başçısını ABŞ-la
münasibətləri sabitləşdirmək arzusunu Cənubi Koreyanın nümayəndə
heyətiylə görüşdə ifadə edib.
“Kim Çen Inın son məqsədi ABŞ-la sülh müqaviləsini imzalamaq və
Pxenyanda Amerika səfriliyinin açılışı da daxil olmaqla, normal
diplomatik münasibətlər qurmaqdır”, - mənbə söyləyib.
Daha əvvəl Şimali Koreya lideri ABŞ prezidenti Donald Trampla
görüşməyi təklif edib. Vaşinqton görüşə razılıq verib. Ağ Evdən
bildiriblər ki, görüşün vaxtı və yeri daha sonra
uyğunlaşdırılacaq.
ABŞ Koreya yarımadasında vəziyyətin nizama
salınmasına dəstək olaraq Çinin və Rusiyanın bəyanatını BMT
Təhlükəsizlik Şurasında bloklayıb. Bu haqda Rusiyanın
BMT-dəki nümayəndəliyinin təmsilçisi Fyodor Strjijovski
bildirib.
“ABŞ-ın müzakirəsiz Rusiya-Çin təşəbbüsünü bloklaması
Vaşinqtonun həqiqi niyyətləri haqqında suallara səbəb olur”, -
Rusiya diplomatı qeyd edib.
Ukrayna
“Maydan hadisələri zamanı “Ukrayna” mehmanxanasına
snayperləri Ali Radanın hazırkı spikeri Andrey Parubiy
yerləşdirib”. Bu haqda Ukrayna Ali Radasının üzvü
Nadejda Savçenko bildirib.
Onun sözlərinə görə, 2014-cü ildə etiraz aksiyalarının
iştirakçıları silahlı idi və təşkilatçılarının razılığı ilə tətbiq
edilirdi.
Maydana snayperləri kim gətirmişdi? – ŞOK İDDİA
Ukrayna Radası Nadejda Savçenkonu Müdafiə
Komitəsindən uzaqlaşdırıb. Savçenkonun komitədən uzaqlaşdırılmasını
269 deputat dəstəkləyib. Deputat Ukraynanın AŞPA-dakı
nümayəndə heyətinin də tərkibindən çıxarılıb.
Ömər Dağlı
Xəbərin orijinal ünvanı: http://publika.az/news/nida_tehlil/234590.htmlŞahid olduğunuz hadisələrin video və ya fotosunu çəkərək bizə göndərin: 0552252950 (Whatsapp)