"Əfqanıstandakı "Taliban" hərəkatının maliyyə mənbələri arasında Rusiya da var. Bəli, bu belədir və "Taliban" rəhbərliyi də faktı təsdiqləyir.
Britaniyanın nüfuzlu The Times qəzeti "Russia funds Taliban in war against Nato forces" ("Rusiya "Taliban"ı NATO-ya qarşı savaşda maliyyələşdirir") məqaləsində belə iddia ilə çıxış edib.
"Yeni reallıq formalaşır. "Taliban" üzvlərinin və Əfqanıstanın rəsmi şəxslərinin dediklərinə görə, Rusiya "Taliban"ın Əfqanıstanda NATO-ya qarşı hərbi əməliyyatlarını gizli yanacaq satışı proqramı vasitəsilə maliyyələşdirir. Rusiyanın xüsusi xidmətləri Özbəkistanın Əfqanıstanla sərhədindəki Hayraton keçidi vasitəsilə Əfqanıstana benzin sisternləri karvanları yollayır. Bu sisternlər "Taliban"ın maraqlarına xidmət edən şirkətlərə məxsusdur. Neft satışından şirkətlər hər ay təqribən 2,5 milyon dollar qazanırlar və bu pullar bilavasitə "Taliban"a gedir.
Rusiya "Taliban"ı Əfqanıstanda İŞİD-ə qarşı mübarizədə də dəstəkləyir.
"Yanacağı satır və pulları bilavasitə komandirlərimiz arasında bölüşdürürük, - "Taliban"ın Qəzni vilayətindəki "xəzinədar"ı deyib. - Ruslardan pul almaq o qədər də xoşumuza gəlmir. Amma cihadımızın indiki mərhələsində bunu etməliyik".
Beləliklə, "Taliban" Rusiyadan yardım aldığını ilk dəfə etiraf edib.
Əfqanıstanın Müdafiə Nazirliyi isə bəyan edib ki, Rusiya Əfqanıstanın dostudur və terrorçularla mübarizədə əfqanlara dayaq olmalıdır.
"Düz deyil. Rusiyanın "Taliban"a yardım edir, ya etmir - düz deyil. Nə bizim xeyrimizədir, nə də Rusiyanın. Rusiya dostumuzdur, buna görə də Əfqanıstanda təhlükəsizlik qüvvələrini və əfqan hərbçilərini dəstəkləməlidir", - Əfqanıstan Müdafiə Nazirliyinin mətbuat katibi Dövlət Vəziri deyib.
Əfqanıstan parlamentinin üzvü Nahid Fərid isə söyləyib ki, Rusiya regiondakı vəziyyəti nəzarət altına almağa çalışır.
Milli.Az
