Bakı, 8 may, AZƏRTAC
Mərkəzi Bankın sədri Elman Rüstəmov Avropa Yenidənqurma və İnkişaf Bankının (AYİB) prezidenti Sumo Çakrabartinin rəhbərlik etdiyi nümayəndə heyəti ilə görüşüb.
Mərkəzi Bankın mətbuat xidmətindən AZƏRTAC-a bildiriblər ki, görüşdə Azərbaycanın bank sektorunda AYİB-in aktiv iştirakı və əməkdaşlığı, bank sisteminin davamlı inkişafı, o cümlədən Mərkəzi Bank ilə AYİB arasında əməkdaşlıq münasibətlərinin inkişaf perspektivləri və prioritet sahələr üzrə texniki yardım istiqamətləri məsələləri müzakirə olunub.
Mərkəzi Bank ilə AYİB arasında əlaqələri yüksək qiymətləndirən E.Rüstəmov AYİB-in Azərbaycan bank sistemi ilə əməkdaşlığı çərçivəsində bir sıra layihələrin uğurla həyata keçirildiyini bildirib. O, nümayəndə heyətinə Azərbaycanın makroiqtisadi göstəriciləri, iqtisadi artım, iqtisadiyyatın şaxələnməsi, qeyri-neft sektorunun davamlı inkişafı, maliyyə, o cümlədən bank sektorunun iqtisadi inkişafda rolunun artırılmasına dair ətraflı məlumat verib. Qeyd edilib ki, Azərbaycanın bank sektorunda vəziyyət sabitdir, sektor kifayət qədər kapitallaşıb və kapital adekvatlığı yüksəkdir.
E.Rüstəmov Azərbaycanın AYİB ilə əməkdaşlığının əhəmiyyətini vurğulayaraq diqqətə çatdırıb ki, AYİB ilə əməkdaşlığın artıq yeni strateji istiqamətləri ortaya çıxır və bütün bu istiqamətlər qeyri-neft sektorunda investisiya fəallığının daha da artırılması və şaxələnmənin sürətlənməsinə yönəlib. Vurğulanıb ki, AYİB ilə Ölkə üzrə Strategiyasında qeyri-neft sektorunun inkişafına xüsusi önəm verilməli, bu sahədə maliyyələşmə və sərmayələrin həcmi artırılmalıdır.
Görüşdə S.Çakrabarti təmsil etdiyi qurumun ölkəmizlə əməkdaşlıqdan məmnun olduğunu bildirərək əlaqələrin bu gün də çox uğurla davam etdiyini qeyd edib. O, ölkədə hazırkı sosial-iqtisadi inkişaf strategiyasının realizasiyasında hökumətlə AYİB arasında sıx əməkdaşlığın vacibliyini vurğulayıb. AYİB-in Ölkə üzrə Strategiyası çərçivəsində ölkədə qeyri–neft sektorunun inkişafı ilə bağlı bank sektoruna dəstəyin gücləndirilməsi, Azərbaycanda bu günə qədər həyata keçirdiyi layihələr, maliyyə institutları ilə sıx əməkdaşlıq və gələcəkdə yeni layihələrin həyata keçirilməsində əməkdaşlıq imkanları barədə məlumat verilib.
