Prezident İlham Əliyev fevralın 3-də “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda çıxışı zamanı işçilərin iş rejimi barədə də danışıb.
Ölkə başçısı deyib ki, sahibkarlar fəaliyyətini qanunvericiliyə uyğun qurmalıdırlar, əmək müqavilələri bağlamalıdırlar, işçiləri istismar etməməlidirlər; “Çünki mənə verilən məlumata görə, bəzi hallarda işçiləri vaxtından çox işlədirlər. Bizim 8 saatlıq iş günümüz var. Heç kim ondan artıq işləməməlidir. Amma daha çox pula qənaət etmək üçün 10 saat, 12 saat, ondan da çox işlədirlər. Buna son qoyulmalıdır və Nazirlər Kabineti buna nəzarət etməlidir. Xüsusi müşavirə keçirilsin ki, bu məsələlər müzakirə olunsun və əgər belə hallara yol verilirsə, o sahibkar cəzalandırılacaq.
Prezident çıxışı zamanı işçilərə də müraciət edib: “Siz də əmək müqaviləsi olmadan işləməyin. Mən bilirəm ki, bəzi hallarda sizi məcbur edirlər. Amma bilin ki, əgər əmək müqaviləsi olmasa, sabah pensiya, tibbi sığorta ala bilməyəcəksiniz. Ona görə sahibkarlar vergisini ödəməli, bütün qanuni tələblərə riayət etməli və məsuliyyətli olmalıdırlar. İmkanlı sahibkarlar, əlbəttə ki, öz sosial məsuliyyətini də dərk etməlidirlər. Eyni zamanda, əsassız olaraq işçiləri ixtisar etməməlidirlər. Çünki ixtisar edilən hər bir iş yeri bir ailəni çörəksiz qoyur. Buna getmək olmaz”.
Məsələ ilə bağlı hüquq müdafiəçisi Sahib Məmmədov “Report”a deyib ki, Prezident İlham Əliyevin dünənki müşavirədə əmək bazarı ilə qaldırdığı bütün məsələlər aktual və vacibdir.
Hüquq müdafiəçisi bildirib ki, Azərbaycanda çalışan işçilərin yalnız üçdə birinin əmək müqaviləsi var: “Rəsmi statistikaya inansaq, bütün işləyənlərin üçdə birinin əmək müqaviləsinin olduğunu görəririk. Əmək müqaviləsi olmayan yerdə isə iş, istirahət rejimindən, əmək münasibətlərindən danışmağa dəyməz. Azərbaycanda tikinti şirkətlərinin, holdinqlərin heç biri işçilərlə əmək müqaviləsi bağlamır. Həmin şirkətlərə də güldən ağır söz deyən yoxdur. Gözümüzün qarşısında görürük ki, tikinti şirkətlərində insanlar tezdən saat 8:00-dan 19:00-a qədər işləyir, əmək müqaviləsi və digər qaydalara əməl olunmur. Ona görə də Prezident haqlı olaraq bu məsələyə toxunub”.
S.Məmmədovun sözlərinə görə, əgər Nazirlər Kabineti tərəfindən Dövlət Əmək Müfəttişliyi Xidmətinə yenidən yoxlamalar aparmağa icazə verilsə belə, vəziyyət düzəlməyəcək:
“Çünki Dövlət Əmək Müfəttişliyi Xidmətinin bu məsələ ilə bağlı potensialı yoxdur, işçi qüvvəsi azdır, kifayət qədər səriştəli kadr bazası yoxdur. Əvvəllər isə tamamilə korrupsiyalaşmış bir qurum idi. İndi isə həmin qurum haqqında bir söz deyə bilmərəm. Hesab edirəm ki, Prezident İlham Əliyevin dünənki müşavirədə əmək bazarı ilə qaldırdığı bütün məsələlər ətrafında ciddi işlər görülməlidir”.
