Tovuz, 20 iyun, AZƏRTAC
Tovuz rayonunun fermerləri arpa biçininə başlayıblar. Torpaq sahibləri 9 min 861 hektarda bol taxıl yetişdiriblər.
İlk olaraq arpa biçininə start verən fermerlərin əkin sahələrinə göstərdikləri aqrotexniki qulluq, havaların əlverişli keçməsi onların cari ildə daha çox məhsul əldə edəcəklərindən xəbər verir. Bu günədək biçilən sahələrin hər hektarından orta hesabla 25-27 sentner məhsul yığılıb.
Rayon icra hakimiyyətindən AZƏRTAC-a bildiriblər ki, hazırda zəmilərdə kifayət qədər kombayn və köməkçi texnika işləyir. Məhsulu vaxtında və itkisiz yığmaq üçün fermerlər bütün səylərini səfərbər ediblər.
