Bakı, 16 iyul, AZƏRTAC
Əmək və Əhalinin Sosial Müdafiəsi Nazirliyində (ƏƏSMN) cari ilin birinci yarısında tibbi-sosial ekspertiza və əlilliyi olan şəxslərin reabilitasiyası sahəsində görülən işlərin yekunlarına və qarşıda duran vəzifələrə həsr olunmuş iclas keçirilib.
Nazirliyin ictimaiyyətlə əlaqələr sektorundan AZƏRTAC-a verilən məlumata görə, iclası giriş sözü ilə açan əmək və əhalinin sosial müdafiəsi nazirinin müavini Natiq Məmmədov ölkəmizin sabit makroiqtisadi inkişafı şəraitində əhaliyə göstərilən tibbi-sosial ekspertiza və reabilitasiya xidmətinin keyfiyyətinin yaxşılaşdırılmasının, bu sahədə müasir tələblərə uyğun və şəffaf xidmət sisteminin qurulmasının əsas vəzifələrdən olduğunu bildirib. Bu istiqamətlərdə məqsədyönlü işlərin görüldüyünü qeyd edən nazir müavini Prezident İlham Əliyevin 16 mart 2015-ci il tarixli Fərmanı ilə ƏƏSMN yanında Dövlət Tibbi-Sosial Ekspertiza və Reabilitasiya Xidmətinin (DTSERX) yaradılmasının hesabat dövrünün ən mühüm tədbiri olduğunu və bunun müvafiq sahədə idarəetmə sisteminin daha səmərəli təşkilinə, müsbət keyfiyyət dəyişikliyinə imkan yaratdığını vurğulayıb.
DTSERX-nin rəisi İlqar Qurbanov isə əlilliyi olan şəxslərin və sağlamlıq imkanları məhdud uşaqların ekspertizası və reabilitasiyası işinin səmərəli təşkili, bu sahəyə nəzarətin artırılması istiqamətində rəhbərlik etdiyi qurumun həyata keçirdiyi tədbirlər barədə məlumat verib. O, həmçinin tibbi-sosial ekspert komissiyalarının iş şəraitinin yaxşılaşdırılması istiqamətində görülən işlərdən də söz açıb, ötən ilin ortalarından etibarən artıq 26 tibbi-sosial ekspert komissiyasının müasir iş şəraiti ilə təmin edildiyini bildirib.
Hesabat məruzəsi ilə çıxış edən ƏƏSMN-in əlillərin sosial müdafiəsi siyasəti şöbəsinin müdiri Saday Abdullayev ilkin əlillik təyin edilmiş şəxslərin sayının ötən ilin müvafiq dövrünə nisbətən 3600 nəfər, təkrar əlil hesab edilənlərin sayının isə 3 min nəfər azaldığını bildirib: “Bu dövrdə tam reabilitasiya 3,2 faiz, hissəvi reabilitasiya isə 2,6 faiz təşkil edib. İlkin əlillərə müddətsiz əlillik təyin edilməsi halları son 6 ayda 11,8 faiz, sağlamlıq imkanları məhdud uşaq hesab edilmiş şəxslərin sayı isə 2639 nəfər azalıb. Son 6 ayda əlilliyi olan şəxslər ümumilikdə 16,4 min ədəd protez-ortopedik məmulat və reabilitasiya vasitəsi, 908 ədəd əlil arabası, 216 ədəd eşitmə aparatı ilə təmin edilib. ƏƏSMN-nin Əlillərin Bərpa Mərkəzlərində 3000 nəfər əlilliyi olan şəxsə bərpa müalicə xidməti göstərilib. Hazırda bu mərkəzlərin bir çoxunda əsaslı təmir işləri aparılır. Təmir işlərindən sonra bu mərkəzlərdə sosial reabilitasiya xidmətlərinin göstərilməsi üçün müvafiq şərait yaradılacaq”.
S.Abdullayev tibbi-sosial ekspertiza və reabilitasiya xidmətinin elektron-informasiya sisteminin tam şəkildə fəaliyyət göstərməsi üçün bütün işlərin artıq başa çatdırıldığını da diqqətə çatdırıb: “Cari il iyulun 1-dən müvafiq məlumatların tibbi-sosial ekspert komissiyaları tərəfindən aidiyyəti dövlət qurumlarına elektron qaydada ötürülməsi təmin edilir ki, bu da müvafiq sahədə kağız daşıyıcılarından imtinaya, məlumatların ötürülməsində operativliyin təmin edilməsinə və məmur-vətəndaş münasibətlərinin minimuma endirilməsinə imkan yaradır”.
Əlilliyin müəyyən olunması sisteminin təkmilləşdirilməsi işlərindən bəhs edən şöbə müdiri hesabat dövründə 18 yaşadək uşaqların sağlamlıq imkanlarının müəyyən edilməsi meyarlarının yeni layihəsinin hazırlandığını da qeyd edib: “Hazırda layihə əlaqədar qürumlarla razılaşdırılma mərhələsindədir. Layihədə əksini tapan yeni meyarlar 18 yaşadək uşaqların sağlamlıq imkanlarının müəyyən edilməsinə və tibb elminin mövcud səviyyəsinə uyğun olaraq baxılmasına, eləcə də uşaqların sağlamlıq imkanları məhdudluğunun daha uzun müddətə müəyyən edilməsinə imkan verəcək. Bu meyarlar sağlamlıq imkanlarının müəyyən edilməsi prosesində məmur-vətəndaş əlaqələrini minimuma endirməyə də şərait yaradacaq”.
İclasda cari ilin birinci yarısında tibbi-sosial ekspertiza və əlillərin reabilitasiyası sahəsində görülən işlərin müsbət nəticələri ilə yanaşı, nöqsanlara da toxunulub. Fəaliyyətində nöqsan və çatışmazlıqlara yol verən vəzifəli şəxslər barəsində tədbirlərin görülməsinə dair qərarlar qəbul olunub.
