Rəqsanənin qızı Aysun: “Anam da, mən də hər səhər acqarına xiyar yeyirik” – “BAZARLIQ”

Rəqsanənin qızı Aysun: “Anam da, mən də hər səhər acqarına xiyar yeyirik” – “BAZARLIQ”
12:09 27 Dekabr 2014
Ölkə mətbuatı
A- A+

“Moskvada olanda “skayp”ı qoşurdum, nənəm başa salırdı ki...”

Onları hər gün efirdə, qəzet və jurnal səhifələrində, saytlarda görürsünüz. Müxtəlif açıqlamalar verirlər, qalmaqal yaradırlar, bir sözlə gündəmdə qalmağa çalışırlar. Maraqlananlar, pərəstişkarları onların ən adi hobbilərindən tutmuş, qarderoblarında belə nələrin olduğunu deyə bilərlər. Hətta nə vaxt yuxudan durub, nə vaxt yatdıqlarını, nə yeyib, nə içdiklərini belə mediadan gizlətmirlər.

 

Amma onların da asudə vaxtları, qayğıları olur. Onlar da hamı kimi dükan-bazara gedir, ərzaq alır, yemək bişirir, qonaq çağırır… Deyəsən, çox uzatdıq; qısası, Lent.az-ın bu həftə “Bazarlıq”ında müğənni Rəqsanə İsmayılovanın qızı, modelyer Aysun İsmayılovadır.

 

 

Görüşümüz alış-veriş edəcəyi supermarketin qarşısında oldu. Aysun tək deyildi. Yaradıcılıq işlərində ona yardımçı olan prodüser Nigar Muradla  birgə gəlmişdi. Salamlaşıb, sorğu-suala başlayıram.

 

 

- Aysun de görək haralardasan? Qarşıda nə işlərin var?

 

 

- Anamla birgə Moskvaya getmişdik. Bildiyiniz kimi mən orada dizaynerlik üzrə təhsil alıram. Hazırda bütün diqqətimi həm təhsilə, həm də yaradıcı işlərimə yönəltmişəm.

 

 

- Yaradıcılıq işlərin nədən ibarətdir. Bəlkə ətraflı məlumat verərdin.

 

- Artıq bir neçə ildir ki, dizaynerliklə məşğulam. Azərbaycanda bir çox tanınmış müğənnilərin geyimlərini hazırlamışam. Hələ qarşıda bir neçə tanınmış müğənni üçün də geyimlər hazırlayacam. Bundan əlavə anamla birgə layihə həyata keçiririk. Ana-bala veriliş aparacağıq. Həmin layihənin çəkilişləri davam edir. Çəkilişlər cəzaçəkmə müəssisələrində baş tutacaq. İnşallah, yaxşı bir veriliş ərsəyə gələcək.

 

 

- Yaradıcılıqdan danışdın, keçək bazarlığımıza. De görək, alış-verişlə aran necədir?

 

- (Bir az düşünür) Hə, bax, bu çətin sual oldu. Açığını deyim. Yalandan deməyim, ömrümdə birinci dəfədir ki, bazarlığa çıxıram. Evdə bu işi əksər hallarda nənəm edir. Allah ona can sağlığı versin ki, bu işi öhdəsinə götürüb.

 

- Ömründə ilk dəfə bazarlığa çıxan Aysun bu gün nə alacaq?

 

- (Gülür) Əslində bu gün bayram bazarlığı edəcəm. Nənəmə də dedim ki, bu gün alış-verişə özüm gedəcəm. Nənəm nəyi alacağımı qabaqcadan mənə deyib. Ona görə də çətinlik çəkməyəcəm.

 

 

 Alış-verişimizə başlayırıq.

 

- Bəlkə də inanmayacaqsınız, mən və anam səhər yuxudan duran kimi, yalnız xiyar yeyirik. Sonra da yoqurt . Daha sonra isə yemək. Burdan pomidor, xiyar, alma, armud, gavalı alacam.

 

 Dediyi kimi də edir. Hərəsindən 1 kilo olmaqla pomidor, xiyar, alma, armud, gavalı alır.

 

- Yemək bişirməklə aran necədi?

 

- Yalandan deyə bilmərəm ki, yaxşı yeməklər bişirirəm. Amma müəyyən yeməklər var ki, onları hazırlaya bilirəm. Amma nənəmin sayəsində. Sağ olsun ki, məni öyrədib, başa salıb. Moskvada yemək bişirmək lazım olanda “skayp”ı qoşurdum, nənəm başa salırdı ki, filan yeməyi belə bişirirlər. İndi imkan ver, keçim yağ satılan yerə. (Gülür)

 

 

 

 Satıcıdan qarğıdalı yağı istəyir.

 

- Sizdə qarğıdalı yağı var?

 

- Bəli.

 

- Zəhmət olmasa balacasını verərdiniz. Böyüyünü istəmirəm. Çünki elə də istifadə olunmur.

 

- Aysun, deyirsən ki, evdə alış-verişi nənəm edir. Bəs sabah ailə qurdun, bu işi kim görəcək?

 

- (Gülür) Hələ ailə qurmağı düşünmürəm. Ona görə də, o barədə düşünə bilmirəm. Ailə qurmaq mənim üçün tezdir. Çünki bütün sevgimi işimə həsr eləmişəm. Bu dəqiqə mənim sevgim, işimdir. Nə bilim... Bəlkə də ailə quranda yəqin ki, bir xadimə götürərik. Çünki mən iş qadını olduğuma görə, evdə oturub, yemək bişirib, bazarlığa çıxmağa vaxtım olmayacaq. Vaxt çatdırmaram. Yəqin ki, gələcək həyat yoldaşım “kırmaz beni”. (Gülür)

 

 

 

Söhbət edə-edə ağartı məhsulları satılan şöbəyə keçirik.

 

- Burdan yalnız yoqurt götürəcəm. Hər gün yoqurt yeməliyəm. Ona görə də çox alım.

 

9 ədəd yoqurt alır.

 

 

- Aysun, daim formadasan. Yəqin pəhriz saxlayırsan...

 

- (Sözümü yarımçıq kəsir) Hə, daim yeməyimə diqqət edirəm, idmanla da məşğul oluram. İdman müəllimim mənə proqram yazıb, o cədvələ uyğun yemək yeyib, idman edirəm. Necə deyərlər, gözəllik qurban tələb eləyir.

 

- Mənə maraqlıdır, əksər hallarda müğənnilərin övladları elə valideynlərinin yolu ilə gedir. Bəs sən niyə ifaçı olmaq istəmədin?

 

- Bilirsən, müğənnilik çox çətin sənətdir. Anamın toy idarə etməyini görmüşəm, çox çətindir. Mən bunu bacarmaram. Həm də ki, anamda olan səs məndə yoxdur.

 

- Necə oldu ki, dizayner olmaq qərarına gəldin?

 

- Elə uşaq yaşlarımdan bu sahəyə maraq göstərirdim. Televizora baxan zaman, deyirdim ki, “bax filankəs belə geyinsə, yaxşı olardı”, “Filankəsə filan geyim yaraşmır”. Bir sözlə geyinib-keçinməyi çox sevirəm. Qərara aldım ki, modelyer olacam. Sağ olsun ki, anam istəyimə qarşı çıxmadı. O, mənə dəstək oldu. Ona görə də o, mənə həm ata, həm anadır. Bu günə qədər mən ata yoxluğunu hiss etməmişəm. Buna görə anama təşəkkürümü bildirirəm.

 

Şirniyyat şöbəsindəyik.

 

- Bayram olduğuna görə, bu gün yaxınlarıma bayram hədiyyəsi alacam. Nənəmə, bacım Yağmura yeni il xonçası götürüm. Amma evdə daim yediyim şokoladım qurtarıb. Baxım, görüm burda var...

 

 

İstədiyi şokoladı tapır.

 

- Yalçın, mən daim bu şokoladdan yeyirəm. Azərbaycan istehsalı olun fıstıqlı şokolad. Elə bunun birini burda yeyəcəm.

 

Dediyi kimi edir. Şokoladın kağızını qopardır, yeyir. Fotoqrafımız da bu anı lentə alır.

 

Şirniyyat şöbəsindən 2 ədəd yeni il xonçası və 1 kiloqram şokolad alır.

 

- Mən yaşıl çay içirəm. Bir ədəd yaşıl çay  və qəhvə də alım.

 

 

1 ədəd 750 qramlıq çay, 1 ədəd də 500 qramlıq qəhvə alır.

 

 

- Aysunun sevmədiyi yemək var?

 

- Demək olar ki, bütün yeməkləri xoşlayıram. Yemək, Allahın verdiyi ruzidir, şükür etmək lazımdır. Naşükür olmaq, onu yemirəm, bunu yemirəm demək lazım deyil.

Mənə elə gəlir ki, hər şey aldım. Təbii meyvə şirəsi də alım, alış-verişi yekunlaşdıraq.

 

2 ədəd təbii meyvə şirəsi alır.

 

- Lap yadımdan çıxmışdı. Ət almalıyam. Gedək bir kilo mal əti alaq. Mal, qoyun ətindən anlayışım yoxdur. Yalçın, mənə kömək elə 1 kilo mal əti alım. (gülür)

 

1 kilo mal əti alır.

 

Kassaya yaxınlaşırıq. Kassir xanım malları bir-bir hesabladıqca, Aysun kisəsinin ağzını açır.

 

- Aysun, səncə, bu gün neçə manatlıq alış-veriş etdin?

 

- Dəqiq nəsə deyə bilmərəm. İndi baxaq görək, kassir xanım nə qədər deyəcək? Qiymət fərq etməz, ən əsası istədiyim məhsulları aldıq.

 

***

 

Beləliklə, Aysun İsmayılovanın aldığı məhsullar hesablanır. Sonuncu məhsulun qiyməti də monitorda görünür və ödəniləcək toplam məbləğ bəlli olur: 102 manat, 83 qəpik...

 

 

 

 

 

 

 

RƏYLƏR

BU KATEQORİYADAN DİGƏR XƏBƏRLƏR