Bakı, 2 dekabr, AZƏRTAC
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə Polşanın “Parnas” təşkilatı tərəfindən həyata keçirilən “Azərbaycan-Şərqin Avropa cazibəsi” layihəsi çərçivəsində Bakıda səfərdə olan Varşava Universitetinin professoru Lukas Qolota və Polşa-Azərbaycan Assosiasiyasının sədri David Sesuda ilə Azərbaycan Tələbə Gənclər Təşkilatları İttifaqının (ATGTİ) ofisində görüş keçirilib.
Görüşdə ATGTİ-nin sədri, Milli Məclisin deputatı Şahin İsmayilov, təşkilatın İcra Aparatının nümayəndələri və Qeyri-Hökumət Təşkilatlarına Dövlət Dəstəyi Şurasının əməkdaşı Toğrul Məmmədli iştirak ediblər.
ATGTİ-dən AZƏRTAC-a bildiriblər ki, görüşdə Azərbaycan və Polşa gənclərinin əlaqələrinin genişləndirilməsi, birgə əməkdaşlığın, layihələrin həyata keçirilməsi, iki ölkə arasında tələbə mübadiləsinin formalaşdırılması məsələləri müzakirə olunub.
Görüşdə ATGTİ ilə Azərbaycan-Polşa Assosiasiyası arasında əməkdaşlıq memorandumu imzalanıb. Həmçinin ATGTİ ilə Varşava Universiteti arasında təcrübə mübadiləsi aparılıb və gələcəkdə icra ediləcək birgə layihələrə dair bir sıra təkliflər irəli sürülüb.