Yəmən münaqişəsi ətrafında vəziyyət təhlükəli şəkil almağa başlayıb.
Publika.az xarici mediaya istinadən xəbər verir ki, ABŞ-ın Yəmənə aviazərbələr endirməsindən sonra hərəkətə keçən İran Yəmən sahillərindəki Ədən körfəzinə hərbi donanma göndərib.
Körfəzə göndərilən döyüş gəmiləri İrana aid ticarət gəmilərin təhlükəsizliyini təmin edəcək. Ədən körfəzi Hind okeanı ilə Qırmızı dəniz arasındakı yol üzərində yerləşir və strateji əhəmiyyət daşıyır. Körfəz Səudiyyə Ərəbistanının liderlik etdiyi koalisiyanın Yəmənə təşkil etdiyi hücumlar üçün əhəmiyyətli bölgədir.
Qeyd edək ki, ABŞ-a aid döyüş gəmilərinə raketlərin atılması ilə bölgədə vəziyyət daha da gərginləşib. ABŞ raketlərin İranın dəstəklədiyi şiə husilərin nəzarət etdiyi ərazidən atıldığını açıqlayıb.
ABŞ Müdafiə Nazirliyinin (Pentaqon) rəsmi nümayəndəsi Piter Kuk Yəməndə üsyançı husilərin nəzarəti altında olan ərazidəki 3 radar sisteminin məhv edildiyini bildirib.