Milli.Az zikr.az-a istinadən bildirir ki, münəccimlik və ya ulduz falı göydə baş verən hadisələrin yerdə olacaq məsələlər ilə əlaqələndirilməsinə deyilir. Rəvayət edilir ki, Zeyd ibn Xalid əl-Cuhəni demişdir:"Peyğəmbər - ona və ailəsinə Allahın salavatı və salamı olsun - Hudeybiyədə gecə ikən yağmış yağışdan sonra bizə sübh namazını qıldırdı və namazı bitirdikdən sonra üzünü camaata çevirib soruşdu:
"Bilirsinizmi, Rəbbiniz nə buyurdu?"
Əshabələr: "Allah və Onun elçisi daha yaxşı bilir"- dedilər.
Peyğəmbər dedi: "Allah buyurdu: "Qullarımdan bir qismi mömin, digər qismi isə kafir oldu. "Bizə Allahın lütfü və mərhəməti sayəsində yağış göndərilmişdir"- deyənlərə gəlincə, onlar Mənə iman gətirmiş və ulduzları inkar etmişlər. "Yağış bizə filan və filan ulduza görə nazil olmuşdur"- deyənlərə gəldikdə isə, onlar Mənə küfr etmiş və ulduzlara iman gətirmişlər". (əl-Buxari, 846).
Hədisdən göründüyü kimi yağışın ulduzun sayəsində yağmasına inanmaq Allaha küfr etməkdir. Həmçinin, ulduzların və planetlərin insan taleyinə təsir etməsinə inanmaq da küfr hesab olunur. Uca Allah buyurur:
"Heç kəs sabah nə qazanacağını bilə bilməz; heç kəs harada öləcəyini də bilməz. Allah isə, şübhəsiz ki, Biləndir, Xəbərdardır" (Loğman, 34).
Milli.Az
