“Fransa NATO-dan və Avropa İttifaqından çıxmalıdır. O
cümlədən, digər ölkələr də ittifaqı tərk etməlidir”.
Publika.az xəbər verir ki, bu barədə Fransanın
ultra-sağçı partiyası olan “Milli Cəbhə”nin lideri Mariya le Pen
deyib.
Le Pen gələn il keçiriləcək prezident seçkilərində iştirak etmək
niyyətinin olduğunu deyib.
“Frexit” mənim siyasətimin əsas hissəsi olacaq. Fransa Avropa
İttifaqından çıxanda Portuqaliya, İtaliya, İspaniya, İrlandiya,
Yunanıstan və Kipr (yunan Kipri-red) də eyni addımı atmalıdır. Bu
ölkələrin Fransa ilə eyni gündə ittifaqdan çıxması mükəmməl olardı.
Mən onları inandırmağa çalışacam”, - deyə o bildirib.
Le Pen ingilisləri və “Brexit”i nümunə göstərib: “İnsanlar
Brüsseldəki texnokratların köləliyindən və şantajından xilas
olmağa, ölkənin müstəqilliyinin qaytarılmasına səs vermək hüququna
malik olmalıdır. İngilislər bunu anladılar və ittifaqdan çıxdılar.
Harada avro var, orada qiymətlər və vergilər yüksəkdir. İşsizliyin
səviyyəsi böyüyüb, əmək haqları və pensiyalar azalıb, kasıb təbəqə
çoxalıb. Avropa İttifaqından çıxandan sonra Britaniyanın iqtisadi
inkişafı sürətləndi”.
Le Pen əlavə edib ki, prezident olarsa, Fransa dərhal NATO-dan
çıxacaq.
“Bu təşkilat artıq lazımsızdır. Vaxtilə SSRİ-yə qarşı yaradılmışdı,
artıq keçmiş ittifaq yoxdur. Vaşinqton NATO-nu Avropadakı
maraqlarına xidmət üçün dəstəkləyir”, - deyə o vurğulayıb.
Le Pen Yunanıstanın baş naziri Aleksis Tsiprası tənqid edib:
“Demokratiya Yunanıstanda doğuldu, orada ölməməlidir. Tsipras öz
ölkəsini satdı”.
Sağçı lider Şengen vizasından da çıxacaqlarını bəyan edib.
Qeyd edək ki, Fransada prezident seçkilərinin ilk turu 2017-ci ilin
aprelində, ikinci turu isə mayda keçiriləcək.
Asif