Tikinti layihələrinin memarlıq üslubuna riayət olunmasına nəzarət ediləcək

Tikinti layihələrinin memarlıq üslubuna riayət olunmasına nəzarət ediləcək
14:22 25 Dekabr 2019
Ölkə mətbuatı
A- A+

Bakı. Trend:

Tikinti layihələrinin memarlıq həllərində müvafiq əraziyə uyğun memarlıq üslubuna riayət olunmasına nəzarət ediləcək.

Trend-in məlumatına görə, bununla bağlı Baş Nazir Əli Əsədov “Müfəssəl planların hazırlanması, razılaşdırılması və təsdiq olunması qaydaları, habelə həmin planların razılaşdırıldığı orqanların Siyahısı”nın təsdiq edilməsi haqqında” 2015-ci il 12 yanvar tarixli 5 nömrəli və “Müfəssəl plan olmadığı və ya onun müddəti bitdiyi hallarda tikintiyə icazə verilməsi və ya məlumatlandırma icraatı məqsədləri üçün tikinti layihələrinin onların həyata keçiriləcəkləri ərazinin planlaşdırılması sənədlərinə (baş planlara və (və ya) ümumi planlara), habelə müfəssəl planın hazırlanması zamanı nəzərə alınan tələblərə uyğunluğunun müəyyənləşdirilməsi Qaydaları”nın təsdiq edilməsi haqqında” 2015-ci il 12 yanvar tarixli 6 nömrəli qərarlarında dəyişiklik edilməsi barədə qərar imzalayıb.

Qərar Prezidentin yeni tikilən binaların tikildiyi ərazinin memarlıq üslubuna uyğunluğunu təmin etmək məqsədi ilə dəyişiklikləri nəzərdə tutur.

2018-ci ildə Prezidentin Fərmanı ilə tapşırılmışdı ki, tikintisinə icazə tələb olunan binaların layihələri hazırlanarkən onların memarlıq üslubunun, tikintinin yerləşdiyi ərazinin ümumi memarlıq mənzərəsinə uyğunlaşdırılması üçün mexanizmlər işlənib hazırlansın.

Yəni, tikilən hər bir bina yerləşdiyi ərazinin (məhəllə, küçə, rayon və s.) ümumi mənzərəsi ilə uzlaşmalı və onun tərkib hissəsi olmalıdır. Bunu həyata keçirmək üçün isə müvafiq mexanizmlərin işlənib hazırlanması tapşırılmışdı.

Qərar bu məqsədlə əvvəlki qərarlara dəyişiklik edib.

Edilmiş dəyişikliklərə əsasən hər hansı bir müfəssəl plan (məhəllə, qəsəbə və s. yaşayış məntəqəsinin və ya onların bir hissəsinə dair şəhərsalma tələblərini özündə əks etdirən plan) hazırlanan zaman planlaşdırılan ərazinin 3D formatında vizual görünüşünün hazırlanması tələb olunacaq.

Ərazinin 3D formatında hazırlanan vizual görünüşündə aşağıdakılar nəzərə alınmalıdır:

- binaların fasadlarının tərtibatında müasir memarlıq üslublarının tətbiqi;

- binaların memarlıq həllərində milli memarlığa xas olan irsin və şərq memarlıq üslubunun müasir formada tətbiqi;

- eləcə də binaların xarici görünüşünün müvafiq ərazi ilə uzlaşdırılması.

Əgər müfəssəl plan yoxdursa, tikinti layihələri şəhərsalma əsaslandırılması layihələrinə (sırf tikinti obyektinin yerləşdirilməsi üçün hazırlanan planlaşdırma sənədi) uyğun işlənməlidir. Odur ki, yuxarıda sadalanan tələblər şəhərsalma əsaslandırılması layihələrinə də şamil edilir.

Şəhərsalma əsaslandırılması hazırlanan zaman binanın memarlıq üslubunun müəyyən edilməsi ilə bağlı sifarişçi (sahibkar, fiziki, hüquqi şəxs) tərəfindən Dövlət Şəhərsalma və Arxitektura Komitəsinə sorğu ilə müraciət oluna bilər. Həmin müraciətə 10 gün müddətində əsaslandırılmış cavab verilməlidir.

Tikintisinə icazə tələb olunan binaların memarlıq həllərində müvafiq ərazinin memarlıq üslubuna riayət edilmədikdə, şəhərsalma əsaslandırılmasını təsdiq edən orqan tərəfindən sifarişçiyə işçi qaydada uyğunsuzluqların aradan qaldırılması üçün zəruri tövsiyələr veriləcək.

Həmin tövsiyələrə uyğun olaraq şəhərsalma əsaslandırılması layihəsi üzrə işlənilmiş memarlıq üslubunu razılaşdırmaq mümkün olmadıqda, layihə üzrə hazırlanması nəzərdə tutulan küçə və məhəllədaxili yolların açılışı cizgiləri sifarişçinin ərizəsi əsasında Azərbaycan Respublikasının Dövlət Şəhərsalma və Arxitektura Komitəsi tərəfindən ödənişsiz qaydada tərtib ediləcəkdir.

Trend-in ən mühüm və maraqlı xəbərlərini "Telegram"da izləyin


Xəbərin orijinal ünvanı: https://az.trend.az/business/3169022.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR