Azərbaycanda uzun illərdir icra başçısı vəzifəsində çalışan məmurlar var. Onlardan bəziləri üç onillikdən artıqdır ki, müxtəlif rayon və şəhərlərə rəhbərlik edir, bəziləri isə 25 ildən çoxdur eyni vəzifəni tutur.
Hazırda da vəzifədə olan həmin icra başçıları arasında ən uzun staja malik şəxslərdən biri Eyvaz Hüseynovdur.
Metbuat.az ölkənin ən uzunmüddətli fəaliyyəti ilə seçilən 5 icra başçısı barədə məlumatları təqdim edir:
Eyvaz Hüseynov - 34 ildən çoxdur
Xocavənd Rayon İcra Hakimiyyətinin başçısı Eyvaz Hüseynov bu siyahıda ilk sıradadır. O, 2 iyul 1992-ci ildə Xocavənd Rayon İcra Hakimiyyətinin başçısı təyin edilib. Beləliklə, 2026-cı ilin iyulunda onun bu vəzifədə fəaliyyətinin 34 ili tamam olub. Hüseynov 15 fevral 1959-cu ildə Xocavənd rayonunun Muğanlı kəndində anadan olub. Hazırda da Xocavənd Rayon İcra Hakimiyyətinə rəhbərlik edir.
Adil Məmmədov - 32 ildən çoxdur
Qobustan Rayon İcra Hakimiyyətinin başçısı Adil Məmmədov da uzunmüddətli fəaliyyəti ilə seçilir. O, 1994-cü ildə Oğuz rayonunun icra başçısı təyin olunub. Daha sonra Qəbələ və Biləsuvar rayonlarına rəhbərlik edib. 26 aprel 2011-ci ildə isə Qobustan Rayon İcra Hakimiyyətinin başçısı vəzifəsinə təyin edilib. Beləliklə, onun icra başçısı kimi ümumi fəaliyyəti 32 ildən çoxdur. Adil Məmmədov hazırda da Qobustan Rayon İcra Hakimiyyətinin başçısıdır.
Taleh Qaraşov - 30 ildən çoxdur
Lənkəran Şəhər İcra Hakimiyyətinin başçısı Taleh Qaraşov da uzun illərdir icra başçısı vəzifəsində çalışan rəhbərlər sırasındadır. O, 1996-cı ildə Kürdəmir Rayon İcra Hakimiyyətinin başçısı təyin olunub. Daha sonra Cəlilabad, Neftçala və Astara rayonlarına rəhbərlik edib. 14 aprel 2012-ci ildən isə Lənkəran Şəhər İcra Hakimiyyətinin başçısıdır. Beləliklə, Taleh Qaraşovun icra başçısı kimi ümumi stajı 30 ildən çoxdur. O, hazırda da Lənkəran Şəhər İcra Hakimiyyətinə rəhbərlik edir.
Eldar Əzizov - 26 ildən çoxdur
Bakı Şəhər İcra Hakimiyyətinin başçısı Eldar Əzizov da 2000-ci ildən icra başçısı kimi fəaliyyət göstərir. O, əvvəlcə Bakının Nizami rayonuna, daha sonra Gəncə və Sumqayıt şəhərlərinə, həmçinin Səbail rayonuna rəhbərlik edib. 15 noyabr 2018-ci ildə Bakı Şəhər İcra Hakimiyyətinin başçısı təyin olunub. Beləliklə, onun müxtəlif şəhər və rayonlarda icra başçısı kimi fəaliyyətinin 26 ildən çox yaşı var. Əzizov hazırda da Bakı Şəhər İcra Hakimiyyətinin başçısıdır.
Malik İsaqov - 25 ilə yaxındır
Qubadlı Rayon İcra Hakimiyyətinin başçısı Malik İsaqov isə 8 sentyabr 2001-ci ildən bu vəzifədədir. Onun Qubadlıya rəhbərlik etməsinin 25 ili 2026-cı ilin sentyabrında tamam olacaq. Hazırda 24 ildən 11 aydan artıqdır ki, bu vəzifəni tutur.
