Bakı, 30 yanvar, AzərTAc
Azərbaycanın tanınmış opera ifaçısı, əməkdar artist, beynəlxalq müsabiqələr laureatı, Rusiya Dövlət Akademik Böyük Teatrının solisti Elçin Əzizov Nyu-Yorkun “Metropoliten-opera” səhnəsində P.İ.Çaykovskinin “İolanta” operasının premyerasında çıxış edib.
Mədəniyyət və Turizm Nazirliyinin mətbuat xidmətindən AzərTAc-a bildiriblər ki, E.Əzizov dünyanın ən nüfuzlu səhnələrindən birində “İolanta” operasının əsas rollarından biri olan mavritaniyalı həkim Ebn Hakianın partiyasını böyük müvəffəqiyyətlə canlandırıb.
Premyerada Elçin Əzizovla yanaşı, dünyanın ən yaxşı opera ifaçılarından olan Anna Netrebko da çıxış edib.
Premyerada ABŞ-da səfərdə olan mədəniyyət və turizm naziri Əbülfəs Qarayev də iştirak edib.
Qeyd edək ki, Elçin Əzizov 1975-ci ildə Bakıda anadan olub. Azərbaycan Dövlət Mədəniyyət və İncəsənət Universitetinin rejissorluq fakültəsində təhsil alıb. 2008-ci ildən Böyük Teatrın opera truppasının solistidir. Bu teatrda bir sıra maraqlı rollarda çıxış edir. Opera partiyalarını ifa etmək üçün o, başqa şəhərlərin - Santyaqo, Varşava, Drezden, Vyana, Tallinn, London, Roma opera teatrlarına dəvət alıb. Beynəlxalq müsabiqələr laureatıdır.