"Nardaranda bu gün də saxlanılanlar olub".
Bu barədə ANS PRESS-ə Nardaran Ağsaqqallar Şurasının sədri Natiq Kərimov məlumat verib. Onun sözlərinə görə, hüquq-mühafizə orqanlarının apardığı əməliyyatlar nəticəsində hər gün demək olar ki, 4-5 nəfər saxlanılır. Bu gün isə hələlik bir nəfər saxlanılıb:
"Mütəmadi olaraq polis əməkdaşları tərəfindən kənddə yoxlamalar aparılır və saxlanılanlar olur. Dünən və bu gün isə aparılanlar mağaza sahibləridir. Onu deyim ki, saxlanılan şəxslərin bəziləri dindirildikdən sonra sərbəst buraxılır. Noyabr ayının 26-da kəndin girişində qurulan postlar hələ də yığışdırılmayıb. Kəndə girib çıxanlar ciddi şəkildə yoxlanılır".
Natiq Kərimov kəndin kəsilən elektrik enerjisinin bərpa edildiyini, ancaq mavi yanacağın hələ də olmadığını bildirib. Onun sözlərinə görə, hazırda kənddə qazın verilməsi üçün hazırlıq işləri aparılır.
Natiq Kərimov - Nardaran Ağsaqqallar Şurasının sədri
Nardaranda noyabr ayının 26-da atışma olub. Hadisə zamanı 2 polis əməkdaşı və 5 yerli sakin dünyasını dəyişib. Dekabr ayının 1-i səhər saatlarında da Nardaranda yenidən xüsusi əməliyyat başlayıb. Əməliyyatla bağlı Daxili İşlər Nazirliyi məlumat yayıb. Məlumatda deyilir:
Dekabr ayının 1-də saat 08.00-da qəsəbədə xüsusi əməliyyat keçirilməsinə başlanılıb. Müvafiq plana uyğun olaraq Daxili İşlər Nazirliyinin Daxili Qoşunlarının və nizami polis hissələrinin məhdud sayda xüsusi texnikası, şəxsi heyəti qəsəbəyə daxil olmuş, müəyyən edilmiş yerlərdə postlar qoyulub və hazırda xüsusi əməliyyat zonasında Baş Prokurorluğun, Daxili İşlər və Milli təhlükəsizlik nazirliklərinin istintaq-əməliyyat qrupu fəaliyyət göstərib.
Nardaranda polis postu
Nardaran qəsəbəsinin sakinlərindən onların əmin-amanlığının təmin olunması naminə keçirilən xüsusi əməliyyat zamanı hüquq qaydasına ciddi riayət etmələri, ictimai asayiş, hakimiyyət nümayəndələrinin həyat və sağlamlığı üçün təhlükə törədən və şərait yaradan hərəkətlərə yol verməmələri, göstərişlərinə əməl etmələri tələb olunur.
Eyni zamanda bildirilir ki, xüsusi əməliyyatı həyata keçirən qüvvələrə müqavimət göstərən, silahlı və ya silah qismində əşyalarla hücüm edən, ictimai qaydanı kobud surətdə pozan hərəkətlərə yol verən şəxslər haqqında qanun çərçivəsində dərhal ən ciddi tədbirlər görüləcək.
Əməliyyat baş verən gün
Natiq Kərimov da dekabr ayının 9-da hüquq-mühafizə orqanlarının əməkdaşları tərəfindən saxlanılıb. Baş Prokurorluğun Ağır cinayətlərə dair işlər üzrə istintaq idarəsinə aparılan şura sədri Nardaran hadisələrinə görə dindirildikdən sonra sərbəst buraxılıb.
