Bakının Yasamal rayonu, Mirəli Seyidov küçəsindəki park yaxınlığında olan yaşıllığa divan tutulur. Milli.Az-a sakinlər hadisə yerindən görüntülər çəkərək məktub ünvanlayıblar.Bakıda ağac soyqırımı sakinlər tərəfindən anbaan lentə alınıb
Onlar bildirirlər ki, ağackəsmə əməliyyatı, hələ də, davam etməkdədir. Şəxsiyyəti naməlum olan adamlar səhər saatlarından qeyd olunan ərazidə işə başlayıblar. Artıq bir neçə hündür ağac dibindən kəsilib.
Sakinlər deyirlər ki, ağaclar yeni hündürmərtəbəli binanın tikintisi səbəbindən kəsilir.
Hadisə ilə bağlı Ekologiya və Təbii Sərvətlər Nazirliyi ilə əlaqə saxladıq. Qurumun mətbuat xidmətinin rəhbəri İradə İbrahimova Milli.Az-a açıqlamasında artıq bu barədə xəbərdar olduğunu söyləyib.
"Sakinlər təxminən yarım saat əvvəl ağacların kəsilməsi ilə bağlı bizim "qaynar xətt"lə əlaqə saxlayıblar. Əməkdaşlarımız artıq hadisə yerinə yollanıblar.
Qeyd olunan yerə baxış keçirildikdən sonra ağacları kəsən şəxslərin kimliyi müəyyən olunacaq" - İradə İbrahimova bildirib.
Ceyhun Ələkbərov
Milli.Az
Videonu izləmək üçün şəkilə klikləyin.