Son bir neçə gündür media Yerin fırlanması haqqında mübahisələr gedir. Milli.Az kulis.az-a istinadən keçən əsrin ilk illərində Mirzə Ələkbər Sabirin yazdığı şeiri polemika üçün aktuallığını nəzərə alaraq çap edir.
BAKIDA BİR KƏNDDƏ MÜHAVİRƏ
Kəndli:
- Denilir, elm oxuyun, sözləri hər anda bizə,
Bunu təsdiq ediyor ayeyi-Quran da bizə,
Axund:
- Hansı Qurandır o ki, onda yazılmış bu xəbər?
Şiə mollası yazan türkicə quransa əgər,
Mən onun yazdığı qurana yavıq durmayıram,
Maşa ilə yapışıb, əl də belə vurmayıram.
Kəndli:
- Xub, buyur sünni yazan bir neçə təfsiri oxu,
Elmin icabı üçün ondakı təqdiri oxu!
Axund:
- Ox, apar bir yana at sünni yazan təfsiri!
Başına dəysin onun tərcüməsi, təhriri!
Bizlərə molla filankəs yazan asar gərək!
Biz olaq ondakı məzmunə xəbərdar gərək!
Kəndli:
-O yazıb: yer öküzün buynuzu üstündə durur,
Biz gərəkdir inanaq ki, kişi boylə buyurur?!
Axund:
- Buna şübhən də var?
Kəndli:
- Əlbəttə, inanmam bu sözə!
Axund:
-Nələtulla, a gavur, şəkk ediyorsan öküzə?!
Milli.Az