Azərbaycan Prezidenti İlham Əliyev “Sputnik” agentliyinə müsahibəsində Dağlıq Qarabağ münaqişəsinin həlli ilə bağlı bir sıra məqamlara toxunub. Ermənistan KİV-i Qarabağ mövzusunda Ankara ilə Moskva arasında müəyyən razılığın əldə olunduğunu iddia edir. Dünyanın çoxdan gözlədiyi Mosul əməliyyatı oktyabrın 18-də başlandı. Qərb-Rusiya gərginliyi davam edir. Ukrayna böhranına görə Qərbin ağır sanksiyaları altında olan Rusiya Suriya münaqişəsinə görə əlavə sanksiyalarla üzləşə bilər.

Prezident İlham Əliyev: “Razılığa gəlsək, Dağlıq Qarabağ muxtar respublika ola bilər”

Dövlət başçısının sözlərinə görə, keçmiş Dağlıq Qarabağ Muxtar Vilayəti ətrafındakı ərazilərin azad edilməsi şərti ilə münaqişənin həlli mümkündür.

Prezident qeyd edib ki, Azərbaycanın ərazi bütövlüyü məsələsində kompromis ola bilməz: "Biz heç vaxt Dağlıq Qarabağa müstəqillik verilməsinə razı olmayacağıq və erməni tərəfi bunu çox gözəl bilir. Lakin yerli özünüidarəçilik məsələlərində kompromis mümkündür. Əgər razılığa gəlsək, bu özünüidarə Dağlıq Qarabağ Muxtar Respublikası şəklində ola bilər. Bundan artıq kompromisə gedə bilmərik”.

İlham Əliyevin sözlərinə görə, ABŞ-ın dövlət katibi Con Kerrinin bəyanatı Qarabağ münaqişəsinin niyə həll olunmadığını bir daha göstərir. “Con Kerrinin Dağlıq Qarabağ münaqişəsi ilə bağlı son açıqlaması diplomatik insidentdir”, - Azərbaycan prezidenti söyləyib.

Prezident qeyd edib ki, Azərbaycanın gələcəkdə Avrasiya İqtisadi Birliyinə qoşulmaq imkanlarını istisna etmək olmaz. “Biz hələ baxmalıyıq ki, hansı tendensiyalar müşahidə olunacaq. Əlbəttə, əgər ittifaq cəlbedici olarsa, ora çoxları can atacaq. Yəni, heç nəyi istisna etmək olmaz, lakin hazırkı mərhələni məni bu cür xarakterizə edərdim”.

Venesuela Prezidenti Azərbaycana gəldi

Venesuela Prezidenti Nikolas Madura Azərbaycana səfərə gəldi. O, Azərbaycan Prezidenti İlham Əliyev və digər rəsmi şəxslərlə görüşdü. Görüşdə iki ölkə arasındakı münasibətlər, işgüzar əlaqələr müzakirə edildi, bir sıra önəmli müqavilələr imzalandı.

Ərdoğan və Putin Qarabağ üçün razılaşdı – Ankaranın ŞƏRTLƏRİ

Erməni politoloqu Manvel Sarkisyanın iddiasına görə, Türkiyə-Rusiya münasibətləri düzələndən sonra məntiqi olaraq erməni məsələsi gündəmə gəlməli idi və Türkiyənin irəli sürdüyü tələb Rusiya tərəfindən qəbul edilib. “Ankara 5 rayonun Azərbaycana qaytarılmasını təklif edib. Moskva da bunu qəbul edib. Rusiya da erməni-türk münasibətlərinin normallaşması şərtini irəli sürüb. Türkiyə şərtlərinin qəbul ediləcəyi halda, bu tələblə razılaşıb”, - politoloq deyib.

Qondarma “DQR”-in keçmiş “XİN rəhbəri” Arman Melikyan isə bu fikirdədir ki, İrəvan ərazilərin qaytarılmasına imza atıb: “Bizim könüllü şəkildə qəbul etdiyimiz Madrid prinsipləri yalnız bir variantı özündə ehtiva edir. Bu da ərazilərin qaytarılmasıdır. Biz bu sənədi imzalamışıq”.

Azərbaycan Prezidenti İlham Əliyevi Rusiya mediasına müsahibə verməsi də Ermənistanda ciddi rezonans yaradıb. Ermənistan mediası bunu Serj Sarkisyanın alçaldılması kimi şərh ediblər. “KTMT-nin İrəvan sammitində Serj Sarkisyanı lağa qoydular, Rusiya mediası isə İlham Əliyevi şərəfə layiq gördü”, - deyə “1in.am” saytı yazıb.

Fransanın ATƏT-in Minsk qrupundakı həmsədri Pyer Andriunu Stefan Viskonti əvəzləyib.

Oktyabrın 18-i erkən saatlarından İraqın Mosul şəhərinin İŞİD terrorçulardan azad edilməsi üzrə əməliyyat başlanıb. Müxtəlif məlumatlara görə, 1,5 milyonluq şəhərdə 4 mindən 8 minə qədər İŞİD döyüşçüsü var. İraq hakimiyyəti və ABŞ müvəffəqiyyətdən şübhələnmir. “Böyük qələbə anı yaxındır” – İraqın baş naziri Heydər əl-Abadi deyib.

Ekspertlər isə əməliyyatın perspektivləri ilə bağlı o qədər də optimist deyillər. Onlarda qorxular var ki, Mosul Suriyanın Hələb şəhərinin taleyini yaşayacaq, döyüşlər faktiki olaraq humanitar faciəyə gətirib çıxaracaq. Qızıl Xaş Komitəsi və BMT yüz minlərlə qaçqın üçün düşərgələr və sığınacaqlar açaraq əlverişsiz hadisələrin inkişafına hazırlaşır.

İŞİD lideri Əbubəkr Bağdadinin isə harada olduğu bilinmir. Lakin Etibarlı mənbədən “Sputnik” agentliyinə verilən məlumata görə, İŞİD lideri Mosul əməliyyatın başlanmasından az öncə şəhəri tərk edib. Təşkilat liderinin Suriyaya keçdiyi təxmin edilir.

Digər bir məlumata görə, Mosuldakı "İslam polisi" Əbu Bəkr əl-Bağdadiyə qarşı "üsyan" edib. "İŞİD liderinə qarşı çevriliş"in başında Mosul sakini Əbu Osmanın durduğu bildirilir. "Üsyançılar" Mosulda əl-Bağdadi hakimiyyətinin başa çatdığını bəyan ediblər.

Sünni əhalinin üstünlük təşkil etdiyi İraqın Mosul şəhərində məzhəb döyüşləri baş verə bilər. İraqın dini liderlərdən olan Kays Gəzali Mosul döyüşündə İmam Hüseynin intiqamını alacaqlarını deyib. Türkiyə isə xəbərdarlıq edib ki, şiə gücləri Mosula girəcəyi halda, bölgədə yüzillik məzhəb döyüşləri başlaya bilər.

Bakının Qarabağda “qırmızı xətti”, yüzillik döyüşlərin ayaq səsləri... HƏFTƏNİN SİYASİ XÜLASƏSİ

“İmam Hüseynin intiqamı alınacaq” – 100 illik döyüş başlanır

Sünni əhalinin üstünlük təşkil etdiyi İraqın Mosul şəhərində məzhəb döyüşləri baş verə bilər.