Daxili İşlər Nazirliyi və Bakı Şəhər Baş Polis
İdarəsinin Təhlükəsiz Şəhər Xidmətləri, Nəsimi Rayon Polis İdarəsi
əməkdaşlarının həyata keçirdikləri əməliyyat-axtarış tədbirləri
nəticəsində oğurluqda və narkotik vasitələrin qanunsuz
dövriyyəsində şübhəli bilinən dəstə saxlanılıb.
Abşeron rayon sakini, əvvəllər məhkum olunmuş Feyruz Novruzov, Bakı
şəhər sakinləri, əvvəllər məhkum olunmuş Natiq İsayev, Eldəniz
Vəliyev, İsmayıl Yusifov, Neftçala rayon sakinləri Vüsal Əsgərov,
Şahmar Abdulov və Zəngilan rayon sakini Vüqar Səlimov
saxlanılıblar.
Nəsimi RPİ əməkdaşları tərəfindən Vüqar Səlimov və Feyruz
Novruzovun ətrafında aparılan əməliyyat tədbirləri ilə onların bu
ilin sentyabrın 27-də Bakı şəhər sakini Şahbaz Rüstəmxanlıya məxsus
nəşriyyat evindən 4200 manat pul oğurlamaları müəyyən edilib.
İstintaq-əməliyyat tədbirlərinin davamı olaraq polis əməkdaşları
Vüqar Səlimovun 2015-ci ilin sentyabrın 26-da Nigar Köçərlinin
müdiri olduğu nəşriyyatdan içərisində 13 min manat olan seyfi
oğurladığını müəyyən ediblər. İki dəfə oğurluq edən V.Səlimov orada
çap şöbəsində çalışıb və bir müddət əvvəl öz istəyi ilə işdən
ayrılıb. Bu səbəbdən o, işlədiyi müəssisədə seyfin harada olduğunu
və ora necə daxil olmağın yolları barədə məlumatlı olub.
Vüqar Səlimov - Saxlanılan şəxs: ""Qanun"
nəşriyyatında operator işləmişəm. Oradan da oğurluq etmişəm.
Qapıdan girib, qapıdan da çıxmışam".
Araşdırmalar zamanı Feyruz Novruzovun digər cinayətlərdə də
iştirakı öz təsdiqini tapıb. Belə ki, o bu ilin noyabr ayının 2-də
dəstənin digər üzvləri ilə birgə gecə saatlarında Nəsimi rayonu
ərazisində yerləşən lombardlardan birindən oğurluq edərək pul və
qızıl-zinət əşyaları ələ keçirib.
Natiq İsayev - Saxlanılan şəxs: "Lombarda girib 9
min manat və 1000 manatlıq qızıl götürdük. Adama 1500 manatdan
düşdü. Ondan sonra aralaşıb getdik. Sabah yenidən çayxanada
görüşdük. Elə orda da tutulduq".
Eldəniz Vəliyev - Saxlanılan şəxs: "Natiq
reşotkanı kəsib mən də içəri girmişəm. Maşında adama 1500 manatdan
böldük. Düşüb taksiyə minib getdim".
Saxlanılan zaman Feyruz Novruzovdan 1,26 qram heroin, Natiq
İsayevdən 1,32 qram, İsmayıl Yusifovdan 2,37 qram, Vüsal Əsgərovdan
1,515 qram, Şahmar Abdulovdan 1,375 qram və Vüqar Səlimovdan 1,960
qram tiryək də aşkar edilərək götürülüb.
Göstərilən faktlarla bağlı Cinayət Məcəlləsinin müvafiq maddələri
ilə cinayət işi başlanılıb. (ARB)