Qarabağla bağlı Rusiya-Türkiyə SAZİŞİ, Putinin kəşfiyyat QRUPU… - GÜNÜN SİYASİ XÜLASƏSİ

Paylaş

Erməni lobbisi dünyanın müxtəlif ölkələrində Azərbaycanla və Dağlıq Qarabağla bağlı uydurma və yalan məlumatlar yayır, beynəlxalq ictimaiyyəti çaşdırmağa cəhd edir və münaqişənin ədalətli həllinə mane olmağa çalışır. Bunu Azərbaycan Prezidenti İlham Əliyev noyabrın 3-də Fransa Milli Assambleyasının Fransa-Azərbaycan dostluq qrupunun rəhbəri Pyer Alen Rafanın başçılıq etdiyi nümayəndə heyəti ilə görüşündə deyib.

Prezident: “Erməni lobbisi Dağlıq Qarabağ münaqişəsinin ədalətli həllinə mane olmağa çalışır” (YENİLƏNDİ)

Türkiyə prezidenti Rəcəb Tayyip Ərdoğan Bakdan qayıdarkən təyyarədə jurnalistlərə açıqlamasında bildirdi ki, yaxın həftələrdə Rusiya prezidenti Vladimir Putinlə görüşəcək və görüşdə Dağlıq Qarabağ münaqişəsini də müzakirə edəcək.

“Türkiyə Dağlıq Qarabağ münaqişəsinin ədalətli həlli üçün Azərbaycanla həmrəy hərəkət etməkdə davam edəcək. Mən bu haqda Rusiya prezidenti Putinlə ya gələn, ya da o biri həftə keçirəcəyimiz görüşdə də danışacam. Onun münasibəti çox əhəmiyyətlidir. Əgər Putin həqiqətən bu məsələyə fokuslanacaqsa, problem asan həll ediləcək”, - deyə Ərdoğan qeyd edib.

Ərdoğanın bu açıqlaması Ermənistanda narahatlıqla qarşılanıb. Erməni şərhçi Sarqis Arstruni yazır ki, Ərdoğan Putinə Qarabağla bağlı yeni saziş təklif edəcək.

Ərdoğan Putinə yeni Qarabağ PLANI TƏQDİM EDİR - İrəvan MƏNGƏNƏDƏ

“Minsk qrupunun həmsədrləri Dağlıq Qarabağ münaqişəsinin nizama salınması üzərində fəal işləyirlər”. Bu barədə Rusiya xarici işlər naziri Sergey Lavrov Moskvada ATƏT-in baş katibi Tomas Qremingerlə görüşdə bildirib.

Lavrov qeyd edib ki, münaqişələrin nizama salınmasında birgə iş çox əhəmiyyətlidir.

İstanbul polisi məşhur azərbaycanlı kriminal avtoritet Nadir Səlifova (Lotu Quli) qarşı sui-qəsd cəhdinin qarşısını alıb. Türkiyənin "Milliyyət" nəşri xəbər verir ki, tutulan şəxslər "Şirinlər" qruplaşmasının üzvləri olub.

Qruplaşmaya "Maks" ləqəbli Mehmet Sabri Şirin başçılıq edir. "Şirinlər" son illər Türkiyədə ölümlərlə nəticələnən bir neçə silahlı qarşıdurmada iştirak edib.

"Lotu Quli"yə SUİ-QƏSD: Rövşən Lənkəranskinin qardaşı saxlanıldı - "ŞİRİNLƏR" ƏMƏLİYYATI (YENİLƏNDİ)

İraq və Suriyanın şimalında Ərbil-Haseke xəttindən istifadə edərək PKK terror təşkilatına minlərlə TIR silah-sursat göndərən ABŞ Türkiyə sərhədindəki Fiş Habur bölgəsinin tamamilə Bağdadın nəzarətinə keçməsinə mane olmağa çalışır.

ABŞ-ın İŞİD-lə mübarizə üzrə beynəlxalq koalisiyadakı xüsusi nümayəndəsi Bret Makqurk (Türkiyədə PKK-nın ali idarəçisi hesab olunur - red.) bu istiqamətdə aktiv iş aparır.

Eyni zamanda, müstəqillik referendumundan sonra bütün qapılar üzünə bağlanan Şimali İraq Kürd Muxtariyyəti və onun keçmiş rəhbəri Məsud Bərzani ABŞ-ın dəstəyi ilə yeni bir planı işə salmağı planlaşdırır.

ABŞ-ın Türkiyəyə qarşı YENİ PLANI

Suriya Deyr-ez-Zor şəhərini İŞİD terror təşkilatından tamamilə təmizləyib. Bu haqda Suriya ordusunun açıqlamasında deyilir.

Hazırda İŞİD döyüşçüləri Suriya-İraq sərhədində dar bir bölgədə qalıb. Sərhədin İraq tərəfində mühasirə vəziyyətində olan İŞİD Fərat çayı hövzəsində kiçik bir yaşayış məntəqəsinə nəzarət edir.

Digər bir xəbərə görə, İraq ordusu İŞİD terror təşkilatının ölkədəki son qalası kimi tanınan Əl-Qaimi azad edib.

“Rusiya hərbçilərinin Suriyada mümkün ixtisarı haqqında xəbərlərdən sonra ABŞ döyüşçülərin dəstəyinə görə səyləri aktivləşdirib”. Bunu Rusiya Federasiya Şurasının müdafiə və təhlükəsizlik üzrə komitəsinin sədr müavini Frans Klinseviç bildirib.

Rusiya senatorunun sözlərinə görə, ABŞ-ın bu hərəkətləri Rusiyanın Suriyadakı müvəffəqiyyəti, ölkə ərazisinin praktik olaraq tamamilə azad edilməsi, həmçinin Suriyadakı hərbçilərimizin ilin sonuna kimi ixtisarı barədə xəbərlərlə bağlı ola bilər. Klinseviçin sözlərinə görə, ABŞ-ın Suriyanı parçalamaq cəhdləri davam edir.

“Buna görə də Rusiyanın hərbi qruplaşmasının ixtisarıyla tələsmək lazım deyil”, - senator söyləyib.

Daha əvvəl Rusiya Müdafiə Nazirliyi ABŞ-ı Şərqi Kalamun və Umm El-Karyateyn ərazisində düşərgələrin yaradılmasında və döyüşçüləri toplamaqda ittiham edib.

ABŞ prezidenti Donald Tramp Asiya-Sakit okeanı regionuna səfəri zamanı Rusiya prezidenti Vladimir Putinlə görüş keçirə bilər. Bu haqda Ağ Evin sahibi “Foks Nyus” telekanalına bildirib.

Rusiya prezidenti Vladimir Putin Donbasa Federal Təhlükəsizlik Xidmətinin (FTX) zabitlər qrupunu göndərib. Bu haqda feysbuk səhifəsində Ali Radanın üzvü, “İnformasiya müqaviməti” qrupunun koordinatoru Dmitri Tımçuk bildirib.

Deputat qeyd edib ki, qrupda Rusiya “LXR” və “DXR”də ciddi təmizləmələri planlaşdırır.

“Donbasa Rusiya xüsusi xidmət orqanlarının nümayəndələrindən (20 insana qədər) ibarət qrup gəlib. Onların əsasını Federal Təhlükəsizlik Xidmətinin kadr zabitləri təşkil edir. İnformasiyaya əsasən, “”LXR” və “DXR”in inzibati strukturlarında “kadr təmizləmələri”nin həyata keçirilməsi qrupun əsas vəzifəsidir”, - Tımçuk yazıb.

Ukrayna Prezidenti Pyotr Poroşenko raket qoşunlarına hazırlıq komandası verib. “Raket qoşunları istənilən an lazım gələrsə Donbasa - sərhəd bölgəsinə qayıtmaq üçün hazır olmalıdır”, - Poroşenko deyib.

Şimali Koreyanın nüvə problemini sülh yolu ilə həll etmək zamanı tükənir. Bu barədə ABŞ Prezidenti Donald Trampın milli təhlükəsizlik üzrə müşaviri Herbert Makmaster danışıb.

Makmasterin sözlərinə görə, Koreya yarımadasında nüvə silahı mövcud olduqca Vaşinqton sakitləşməyəcək. Ölkə başçısı Donald Tramp Asiya-Sakit okean regionuna səfəri zamanı bütün qüvvələr və vasitələri tətbiq etməyə hazır olduğu barədə xəbərdarlıq edəcək.

Bundan əlavə, ABŞ Şimali Koreyanı terrorçuluğu dəstəkləyən ölkələr siyahısına qaytarmaq niyyətindədir. Bu isə öz növbəsində Donald Trampa istənilən zaman Pxenyana zərbə endirmək şansı verəcək.

Ömər Dağlı