Milli.Az qol.az-a istinadən xəbər verir ki, milli komandamızın üzvü Araz Abdullayev sabah Belarusla keçiriləcək yoldaşlıq oyunu öncəsi brifinqdə jurnalistlərin suallarını cavablandırıb.

- Hazırlıqlarınız necə gedir?

- Qurban müəllimin başçılığı altında taktiki məşqlər edirik. Baş məşqçi komandanı çox yükləmir. Çalışırıq ki, oyuna taktiki cəhətdən hazır olaq.

- Rəqib haqda nə deyə bilərsən?

- Layiqli rəqibdir. Xalqımız üçün gözəl oyun göstərmək istəyirik. Əsas məqsədimiz budur. Bundan sonra yaxşı nəticə haqda düşünürük.

- Kipr mətbuatında yazılıb ki, "Anortosis" səni 150 min avro qarşılığında "Qəbələ" dən birdəfəlik transfer etmək istəyir...

- Açığı, indi millinin düşərgəsində olduğumuz üçün bütün fikrimi qarşıdakı oyunlara vermişəm. Başqa şeylər haqda düşünmürəm. Qarşıda 2 oyun var. Həmin matçlardan sonra bu haqda danışmaq olar.

- Zədədən sonra əvvəlki formanı yığa bildin?

- Əlavə məşqlər edirəm ki, formamı yığım. Qarşıdakı 2 oyunda çalışacam ki, əvvəlki formamı bir az da qaytarım.

- Xaricdə çıxış etmək bir insan və futbolçu kimi sənə nə verib?

- Ölkə xaricində oynayıb, milli komandaya dəvət alanda özünə daha çox güvənirsən. Çalşıram ki, yaxşı oyunla, vurduğum qollarla Azərbaycanı layiqincə təmsil edim. Xalqımı qürurlandırım.

- İndiyə kimi millidə bir neçə mütəxəssislə işləmisən. Onlarla Qurban Qurbanov arasında nə fərq görürsən?

- Qurban müəllim futbolçuları daha sakit başa salır. Hər bir oyunçu ilə fərdi söhbətlər edir. Onunla fərdi danışığımız az olub, ona görə də tanışlığımız azdır. Amma tanıdıqdan sonra Qurban Qurbanova hörmətim daha da artdı.

- Ölkə xaricində qalıb oynamaqla bağlı sənə məsləhət veribmi?

- Yox, belə söhbətimiz olmayıb. Ancaq qarşıdakı oyunla bağlı danışmışıq.
Milli.Az