Bakı, 24 aprel, AZƏRTAC
Aprelin 24-də AFFA-nın inzibati binasında Lisenziya Komissiyasının iclası keçirilib.
AZƏRTAC xəbər verir ki, iclasda Lisenziya Komissiyasının üzvləri və Lisenziyalaşdırma Qrupunun əməkdaşları arasında lisenziyalaşdırma qaydalarında baş vermiş dəyişikliklər və qrupun fəaliyyəti ilə bağlı hazırlanmış hesabat müzakirə olunub.
Lisenziya Komissiyasının üzvləri növbəti mövsümdə UEFA və Premyer Liqa yarışlarında iştirak etməklə bağlı müraciətlərə və futbol klubları tərəfindən təqdim olunan sənədlərə ilkin baxış keçirib. Baxış zamanı sənədlərdə aşkarlanmış çatışmazlıqlar müzakirə olunub və müvafiq qərarlar qəbul edilib. İclasdan sonra qərarlar müvafiq klublara göndərilib.
Lisenziya Komissiyasının növbəti iclası mayın 15-i keçiriləcək. İclasda 2015/2016-ci il mövsümündə UEFA və Premyer Liqa yarışlarında iştirak etməklə bağlı müraciət edən klublara lisenziyaların verilib-verilməməsi ilə bağlı qərarlar qəbul olunacaq.
