"Rəvan" rəhbərliyi ilə məşqçilər korpusu arasında görüş baş tutub. Fanat.az xəbər verir ki, iclasda əsas komandanın qış fasiləsində nəzərdə tutulan təlim-məşq toplanışının detalları müzakirə olunub.
Yanvarın 7-dən məşqlərə start verən komandanın 24-dək paytaxtda hazırlıq keçməsi məqsədəuyğun sayılıb. Kollektiv bu müddətdə klubun Qaraçuxurdakı bazasında məskunlaşacaq.
"Rəvan" hazırlığın növbəti mərhələsini Salyan şəhərində keçəcək. Yanvarın 26-da əyalətə yollanacaq komanda Salyan Olimpiya Kompleksində məskunlaşacaq. "Sarı-qırmızılılar" fevralın 8-də Bakıya dönəcək və toplanışa paytaxtda yekun vuracaq.
"Rəvan" toplanış müddətində 8 yoxlama matçında qüvvəsini sınamağı planlaşdırır. Artıq rəqiblərdən 3-ü bəllidi. "Aslanlar" yanvarın 17-də "Qaradağ Lökbatan", 21-də "Ağsu", 24-də isə "Şahdağ"la qarşılaşacaq.
Qeyd edək ki, bütün matçlar "Bayıl Arean”da keçiriləcək və saat 13.00-da başlayacaq.
Fanat.az