Azərbaycanda 1 tondan çox narkotik dövriyyədən çıxarılıb

Dövlət Gömrük Komitəsinin (DGK) sədri, gömrük xidməti general-leytenantı Səfər Mehdiyev ABŞ-ın Ədliyyə Nazirliyi nəzdində Narkotiklərlə Mübarizə üzrə Administrasiyanın Orta Asiya üzrə regional direktoru Vilyam Varenin rəhbərlik etdiyi nümayəndə heyəti ilə görüşüb.

Bu barədə Metbuat.az-a DGK-nın Mətbuat və ictimaiyyətlə əlaqələr idarəsindən məlumat verilib.

Dövlət Komitəsinin sədri Azərbaycan ilə ABŞ arasında strateji əməkdaşlıq və dostluq münasibətlərinin mövcud olduğunu və gömrük sahəsində də bu münasibətlərin uğurla inkişaf etdiyini diqqətə çatdırıb.

S.Mehdiyev Prezident İlham Əliyev tərəfindən bütün sahələrdə olduğu kimi gömrük sistemində də ciddi islahatların həyata keçirildiyini və bu islahatlar nəticəsində daha çevik və dinamik gömrük xidmətinin formalaşdığını diqqətə çatdırıb. Bildirilib ki, ölkəmizin tranzit potensialının artırılması, beynəlxalq ticarətin sürətli, təhlükəsiz və asan şəkildə həyata keçirilməsi məqsədilə qarşıya qoyulan hədəflərin reallaşdırılması üçün gömrük sisteminin fəlsəfəsi nəzarətdən xidmətə doğru dəyişdirilib. Şəffaflığın təmin olunması, gömrük prosedurlarının sadələşdirilməsi məqsədilə həyata keçirilən tədbirlərdən bəhs edən Komitə sədri görülən işlərin nəticəsi olaraq cari ilin müvafiq dövrü ərzində narkotiklərin qanunsuz dövriyyəsinə qarşı mübarizə sahəsində də ciddi nailiyyətlər əldə olunduğunu qeyd edib. Diqqətə çatdırılıb ki, bu il ərzində Azərbaycanın gömrük orqanları 1 ton 200 kiloqrama yaxın narkotik vasitəni dövriyyədən çıxarıb və bu istiqamətdə bundan sonra da qətiyyətli addımlar atılacaq.

Dövlət Komitəsinin sədri ümidvar olduğunu bildirib ki, 2019-cu ilin 16-18 aprel tarixlərində Bakı şəhərində keçiriləcək Narkotiklərlə Mübarizə üzrə 36-cı Beynəlxalq Konfransın bu sahədə beynəlxalq müstəvidə görülən işlərə mühüm töhfə olacaq.

Vilyam Varen səmimi qəbula görə təşəkkürünü bildirib və Azərbaycan gömrük orqanları tərəfindən narkotik vasitələrin qanunsuz dövriyyəsi istiqamətində həyata keçirilən tədbirləri, əldə edilən nailiyyətləri yüksək qiymətləndirib. O da vurğulanıb ki, Bakı şəhərində keçiriləcək Narkotiklərlə Mübarizə üzrə 36-cı Beynəlxalq Konfrans bu sahədə beynəlxalq əməkdaşlığın güclənməsinə, mübarizə tədbirlərinin səmərəliliyinin artırılmasına şərait yaradacaq.

Universitet tələbəsi 1 gün sonra BU HALDA TAPILDI - Oxumaq üçün tıkla


Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR