Naxçıvan, 9 yanvar, AZƏRTAC
2015-ci ildə Naxçıvan şəhərindəki Heydər Əliyev Muzeyini ziyarət edənlərin sayı 16 min 900-dən çox olub. Bunlardan 1817 nəfəri xarici ölkə vətəndaşlarıdır.
AZƏRTAC xəbər verir ki, muzeydəki 4 min 588 eksponatın hər biri ayrı-ayrılıqda elmi-tədqiqat mövzusudur. Muzeyin kitabxana fondunda 581 adda 1189 kitab var. Azərbaycanın müasir dövlətçilik tarixi və ümummilli lider Heydər Əliyevin siyasi irsi ilə maraqlanan hər kəs Heydər Əliyev Muzeyinə üz tutur, tədqiqatçılar burada elmi axtarışlar üçün dəyərli məlumatlar əldə edirlər.
Ötən il muxtar respublikada fəaliyyət göstərən ali və orta ixtisas məktəblərinin tələbələrinin, həmçinin orta təhsil məktəblərinin şagirdlərinin iştirakı ilə muzeydə 208 açıq dərs keçirilib. Ulu Öndərin siyasi irsinin təbliği məqsədilə keçilən açıq dərslərdən sonra iştirakçılar muzeyin ekspozisiyası ilə də tanış olublar.
2015-ci ildə Heydər Əliyev Muzeyində 1127 ekskursiya keçirilib. Muzeyin internet səhifəsini isə 26 min 420 nəfər ziyarət edib.
