Daha bir ərəb ölkəsi benzini bahalaşdırdı. ANS PRESS-in məlumatına görə, neft qiymətinin intensiv düşməsi səbəbindən Qətərdə benzinin qiyməti qaldırılıb.
Ölkənin rəsmi “QNA” agentliyinin məlumatına görə, “Qətər Yanacaq Şirkəti” super benzinin 1 litrinin qiymətini 1 riyaldan 1.30 riyala (0.35 dollar), normal benzinin qiymətini 0.85 riyaldan 1.15 riyala (0.31 dollar) qaldırıb.
Bu həftənin əvəlində Bəhreyndə də benzinin qiyməti 50 faizdən bir az çox bahalaşmışdı.
Ötən ilin dekabr ayında isə Səudiyyə Ərəbistanında daxili bazarda benzin 50-60 faiz, dizel 80 faiz bahalaşmışdı.
Büdcəsinin əsas hissəsini neft hasilatından əldə edən milyardlar səltənətində benzinin bahalaşmasının səbəbi dünya birjalarında neftin ucuzlaşmasıdır.
