"İraq və Şam İslam Dövləti" (İŞİD) terrorçularının Liviyada 21 misirli kopt xristianının başlarını kəsərək edam etməsi dünyada şok effekti yaradıb.
Misir prezidenti Əbdel Fəttah əl Sissi günahsız insanlara divan tutan İŞİD-in bu əmələ görə ağır cəzalandırılacağını bildirib.
Milli.Az Al Arabia-ya istinadən bildirir ki, dünən Qahirədə ölkədəki kopt xristianların dini lideri, yepiskop Tavadrosu qəbul edən prezident Əl Sissi bu dəhşətli aktı törədənlərin "ədalət məhkəməsindən yayına bilməyəcəklərini" vurğulayıb.
Misir Hərbi-Hava Qüvvələrinin qırıcı-bombardmançı təyyarələri Liviyanın Derna şəhərində İŞİD mövqelərini bombalayıblar.
Dünya katoliklərinin dini lideri, Roma Papası 1-ci Fransisk də İŞİD-in vəhşiliyini qətiyyətlə pisləyib.
Misir Müdafiə Nazirliyinin dünən yaydığı bəyanatda isə deyilir: "Liviyada amansızcasına qətlə yetirilən, edam olunan 21 kopt xristian Misirin övladlarıdır. Misir isə övladlarına əl qaldıranların əllərini kəsəcək. Biz DAEŞ-in Liviyadakı mövqelərinə zərbələri davam etdirəcəyik".
Dünya mediasında İŞİD, "İslam Dövləti" kimi tanınan terror təşkilatını ərəb ölkələrində DAEŞ adlandırmağa başlayıblar.
DAEŞ İŞİD-in ərəb dilindəki "Əd Davla əl İslamiya fi əl İraq vəş Şam" adının qısaldılmış, amma tərsinə formada deyilən abbreviaturasıdır.
Eyni zamanda DAEŞ ərəb dilində təhqiramiz kəlmə, "ayaq altındakı murdarlıq" deməkdir.
Milli.Az
