Bakı. 30 iyun. REPORT.AZ/ Bakıda ATƏT-in fəaliyyətdə olan sədri, Almaniya xarici işlər naziri Frank-Valter Ştaynmayer ilə Azərbaycan XİN başçısı Elmar Məmmədyarov arasında təkbətək görüş keçirilib.
"Report" xəbər verir ki, görüş zamanı tərəflər Azərbaycan və Almaniya arasında əlaqələrin inkişaf perspektivlərini, iqtisadi məsələləri, eləcə də Ermənistan-Azərbaycan, Dağlıq Qarabağ münaqişəsinin həlli məsələsini müzakirə ediblər.
Xatırladaq ki, Frank-Valter Ştaynmayer Cənubi Qafqaza səfər çərçivəsində iyunun 29-da Ermənistana səfər edib. Azərbaycana səfərdən sonra Almaniya XİN başçısı Gürcüstana yollanacaq.