BMT-nin Nyu-Yorkda keçirilən Baş Assambleyası təkcə
yemək süfrəsində Trampın Ərdoğanın yanına gələrək, isti
münasibətlərini əks etdirən, həmçinin dünya liderlərinin
tirubunadan bir-birini sətiraltı ittiham etməsindən sonra masa
ətrafında səmimi söhbət etməsi kimi məqamlarla yadda qalmadı.
Azərbaycan Prezidenti İlham Əliyevin BMT tribunasında çıxışı zamanı
salonda əyləşən işğalçı Ermənistanın prezidenti Serj Sarkisyanın
əlinin dinc azərbaycanlıların qanına batdığını deməsi sözün həqiqi
mənasında “soyuq duş” effekti yaratdı.
Publika.az xəbər verir ki, Ermənistan prezidenti BMT-də
Azərbaycan və Türkiyəni ittiham etdi və Azərbaycanın gücündə
danışaraq, dünya birliyindən onlara kömək etməyi xahiş etdi.
Sarkisyan BMT tribunasından istifadə edərək, Azərbaycanı
“təcavüzkar” kimi göstərməyə və “öz müqəddəratını təyin etmə”
prinsipini ön plana çıxarmağa cəhd etdi. Lakin Prezident İlham
Əliyevin çıxışı işğalçı üçün gözlənilməz zərbə, tərs şillə
oldu.
Prezident İlham Əliyevin BMT-dəki çıxışı dünyanın diqqətini üç
mühüm məsələyə yönətldi:
İşğalçının ifşası
Azərbaycan Prezidenti ilk növbədə “Xocalı soyqırımını törədənlərdən
biri də Serj Sarkisyandır” deməklə əli qana batmış erməni
prezidentin çıxışını alt-üst etdi. Daha sonra Azərbaycan
torpaqlarının işğal edilməsi faktına diqqət çəkən dövlət başçısı
Xocalı soyqırımı və hələ də davam edən təcavüzkar siyasətə
toxundu.
“Azərbaycan torpaqlarının 20 faizi 25 ildən artıqdır ki,
Ermənistanın işğalı altındadır. Dağlıq Qarabağ Azərbaycanın qədim
və tarixi torpaqlarıdır: “Ermənistanın işğalı nəticəsində bir
milyondan çox azərbaycanlı qaçqın və məcburi köçkün vəziyyətinə
düşüb. Ermənistanda, Dağlıq Qarabağ və Azərbaycanın işğal olunmuş
digər rayonlarında azərbaycanlılara qarşı etnik təmizləmə siyasəti
həyata keçirilib. Ermənistan azərbaycanlılara qarşı Xocalı faciəsi
törədib. Bu faciə dünyanın 20-dən artıq ölkəsi tərəfindən rəsmən
tanınıb. 1992-ci ilin 26 fevralında Ermənistan 613 Xocalı sakinini
qətlə yetirib. Onların arasında 106 qadın və 63 uşaq var. Bu
cinayəti törədənlərdən biri də Ermənistanın hazırkı prezidentidir”,
- deyə dövlət başçısı vurğuladı.
Prezident İlham Əliyev əlavə etdi ki, təcavüzkara qarşı beynəlxalq
təzyiq yoxdur, Ermənistan diktatorluğuna qarşı sanksiyalar tətbiq
olunmur: “Bu dayandırılmalıdır. Döyüşdə itirən Ermənistan yenidən
Azərbaycanın kəndlərinə hücum edib. Bu ilin iyulunda hədəfli hücum
nəticəsində Alxanlı kəndində 2 nəfər öldürülüb. Bunlar 2 yaşlı
Zəhra Quliyeva və onun nənəsidir. Beynəlxalq ictimaiyyət erməni
terrorizmini və faşizmini dayandırmalıdır”.
Xəbərdarlıq
Prezident İlham Əliyev BMT tribunasından Ermənistana xəbərdarlıq
etdi. Qeyd etdi ki, ötən ilin aprelində Ermənistan daha bir cinayət
törədib. Nəticədə Azərbaycanın 6 dinc sakini öldürülüb, cavab
hücumu ilə Azərbaycan Ordusu işğal olunmuş ərazilərin bir hissəsini
azad edib və bayrağını həmin ərazilərdə ucaldıb. Ermənistan
rəhbərliyi bu dərsi unutmamalıdır. Əks halda, növbəti təxribatın
cavabı daha ağrılı olacaq. Azərbaycan münaqişəsinin sülh yolu ilə
həllinə sadiqdir. Lakin erməni hərbi təxribatı davam edərsə,
Azərbaycan öz əhalisini müdafiə edəcək. Lazım gəlsə, ötən ilin
aprelində olduğu kimi, Ermənistan yenə cəzalandırılacaq.
Ermənistan-Azərbaycan, Dağlıq Qarabağ münaqişəsi beynəlxalq hüququn
prinsipləri əsasında həll olunmalı, Azərbaycanın ərazi bütövlüyü
bərpa edilməlidir”.
Faktiki olaraq, Azərbaycan lideri dünya ictimaiyyəti qarşısında
beynəlxalq hüququn tanıdığı haqqımızdan istifadə edəcəyimizi açıq
şəkildə bəyan etdi. Bu, o deməkdir ki, mənasız danışıqlar heç bir
nəticə vermir və Azərbaycan öz ərazi bütövlüyünü bərpa etmək üçün
istənilən an hərbi əməliyyatlara başlaya bilər. Əslində Prezidentin
ABŞ-a səfəri ərəfəsində ordumuzun genişmiqyaslı hərbi təlimlərə
başlaması da Bakının öz mövqeyində nə qədər inandırıcı olduğunu
nümayiş etdirmək gedişi idi. Təbii ki, dövlət başçısının dediyi
kimi, hər şey beynəlxalq hüquq və BMT qətnamələri çərçivəsində baş
verəcək.
Dünyaya mesaj
Prezident İlham Əliyev BMT tribunasından bu ali orqanın yanlış
siyasətini də dilə gətirdi.
Azərbaycan lideri qeyd etdi ki, aparıcı beynəlxalq təşkilatlar
Ermənistan silahlı qüvvələrinin Azərbaycanın işğal olunmuş
torpaqlarından çıxarılmasını tələb edən qətnamələr qəbul edib: “BMT
Təhlükəsizlik Şurasının da 4 qətnaməsi var. Lakin Ermənistan
qətnamələri yerinə yetirmir, 24 ildir ki, qətnamələrə əhəmiyyət
vermir və cəzalandırılmır. Bəzən BMT Təhlükəsizlik Şurasının
qətnamələri bir neçə gün içində icra olunur. Bizim vəziyyətimizdə
isə 24 ildir ki, icra olunmur. Bu, ikili standartdır və
qəbuledilməzdir. Ermənistana qarşı beynəlxalq sanksiya tətbiq
olunmalıdır. BMT-də aparılmalı olan islahatlardan biri də
Təhlükəsizlik Şurasının qəbul etdiyi qətnamələrin icra mexanizmləri
ilə bağlı olmalıdır”.
BMT tirbunasında BMT-nin səhvlərini dilə gətirmək və haqlı tələbini
irəli sürmək heç də bütün siyasətçilərin ata biləcəyi addım deyil.
Bunu ancaq güclü liderlərin edə biləcəyi faktoru burada diqqətdən
qaçmır. İlham Əliyev güclü lider olduğunu göstərməklə yanaşı,
ədalətin bərpa olunmasını da açıq şəkildə bəyan etdi. Əks təqdirdə,
Azərbaycan Ordusu hərbi əməliyyatlara start verəcək.
Təsadüfi deyil ki, Azərbaycan liderinin BMT tribunasından
səsləndirdiyi fikirlər Ermənistanda ciddi təşviş yaradıb.
Ermənistan mediası “İlham Əliyev dünyanın qarşısında Ermənistana
sonuncu xəbərdarlığını etdi” deyə yazıb.
Asif