Qurumun sədri Ceyhun İbrahimov “Report”a açıqlamasında deyib ki, bu məsələnin reallaşması investisiya şirkətlərinin işinə mənfi təsir etməyəcək və kapital bazarına fayda verəcək.
“İlk baxışdan belə təsəvvür yaranır ki, banklarla investisiya şirkətlərinin maraqları toqquşacaq. Amma bu, belə deyil. Bankların kapital bazarında birbaşa iştirakı, investisiya xidmətləri göstərməsi kapital bazarının inkişafına səbəb olacaq. Çünki bankların kifayət qədər kapitalı, geniş xidmət şəbəkəsi var. Bu məsələ qiymətli kağızlar bazarının inkişafına dair dövlət proqramına da daxildir.
Bir qədər əvvəl təklif olunmuşdu ki, klirinq əməliyyatlarında banklar agent kimi çıxış etsin, amma heç bir bank buna getmədi. Banklara investisiya xidmətləri göstərmək səlahiyyətinin verilməsi isə onları buna vadar edə bilər. Son nəticədə kapital bazarı böyüyə bilər. Yəni, mən bu məsələyə müsbət baxıram. Hesab edirəm ki, investisiya şirkətləri yenə işləyəcək, onların öz bazarı var və yenə də bu sektorun aparıcı qüvvəsi olacaqlar”, - deyə o, qeyd edib.
