Metbuat.az xəbər verir ki, ARB TV-nin “Rezonans” proqramının növbəti buraxılışında məhkum Əmirxan Qurbanovun həyat hekayəsindən danışılıb.

Əmirxan Qurbanov – Cəzası (13 il): “Oğlum məktəbdə müəllim işləyir. Direktor ona deyib ki, sinifdə 1-2 şagirdə icazə vermişəm, kənarda alverlə məşğul olurlar, sən onlara qiymət yaz. Oğlum da razılaşmır. Direktor da yumruqla oğlumun ağzına vurub. Oğlum üz-gözü qan içərisində evə gəldi. Bıçağı götürüb getdim, orada yox idi. Bu iş belə qaldı. Bir axşam oğlum mənə, “ata, mənə kömək et, taxılımızı biçdirək” dedi. Səhər-səhər getdim, dayanmışdım, səs gəldi, gördüm həmin direktor əlində telefon kiminləsə danışır. Yaxınlaşıb dedim, müəllim sənə sözüm var. Oğlumu niyə vurmusan? Dedi, mən etməmişəm. Yapışdı yaxamdan, silkələyib itələdi məni kənara. Mən də bıçağı çıxarıb vurdum qarın nahiyyəsinə. Elə birinci zərbədən öldü. Bıçaq ürəyinə giribmiş. Oğlumda təqsir bilsəydim etməzdim. O, nahaqdan sataşdı mənə. Düzdür, onun balalarını yetim qoydum. Amma onun övladlarını öz balalarımdan da çox istəyirdim. Keçə bilmədim, çünki onun tökdüyü qandan keçmək olmazdı. Biz onunla yaxın olmuşuq. Hərdən fikirləşirəm ki, kaş oğlum müəllim olmazdı, bəlkə onunla mənim aramda da belə hadisə baş verməzdi. Deyirlər, adamı şeytan doldurur. Burada şeytanlıq nə var? Hər kəs öz işinin şeytanıdır. İstəyirəm buradan çıxandan sonra onun övladlarına gücüm çatdığı qədər hörmət edim ki, bəlkə bir balaca ürəklərində mənə qarşı rəhm olsun”.