“İnter”in yarımmüdafiəçisi qışda klub tapmasa karyerasını bitirəcək

- Eşitdiyimizə görə, artıq 3 həftəyə yaxındır ki, “İnter”in məşqlərinə qatılmırsınız?

- Kimdən eşitmisiniz?

- Kollektiv daxilindəki mənbələrdən...

- 3 həftə yox, təqribən 10 gün olar.

- Bu nə ilə əlaqədardır?

- Yəqin ki, “İnter”dən gedəcəyəm. Ona görə.

- Klubla müqaviləniz nə vaxt başa çatır?

- Dekabrın axırında.

- Müqaviləniz ola-ola məşqlərdən kənarda qalmağınıza rəhbərlik necə yanaşır?

- Məşqlərdən kənarda qalmaq deyəndə ki, həm də sol ayağım bir az ağrıyır. Zədəm var.

- “İnter”dən ayrılmağınıza səbəb nədir?

- Əsas səbəb oynamamağımdır.

- Komandadan gedəcəyiniz haqda məşqçini məlumatlandırmısınız?

- Hansı məşqçini?

- Baş məşqçi Valentin Xodukini.

- Hə... Məşqçi demək olarsa.

- Deyəsən, Xodukunin baş məşqçi qabiliyyətinə şübhə edirsiniz...

- Mən bilirəm o necə məşqçidir. “İnter”də olduğum 1,5 il ərzində onun necə məşqçi olduğunu gördüm.

- Baş məşqçinin hansı xüsusiyyətindən şikayətlənirsiniz?

- Heç bir şikayətim yoxdur. Sadəcə, problem oynamamağımdadır.

- Xodukinin məşqçilik qabiliyyəti Sizdə nə vaxtdan şübhə doğurmağa başladı?

- Mənim onun məşqçiliyi ilə nə işim var? O qədər məşqçilərlə işləmişəm ki...

- Xodukinin əvvəllər birgə çalışdığınız baş məşqçilərdən zəifliyini iddia edirsiniz?

- Yox... Mənim onunla nə işim var? Qoca kişidir. Gələcəkdə vaxt olar, bu haqda ətraflı danışarıq.

- Necə düşünürsünüz, əsas heyətdə oynamağa layiq olduğunuz halda, baş məşqçi Sizi qəsdən meydançaya buraxmır?

- Yəqin ki... Mən heç kimə nəyisə sübut etmək istəmirəm. Amma heç kimdən zəif deyiləm.

- “Heç kimdən zəif deyiləm” kəlməsinə futbolçularımızın açıqlamalarında tez-tez rast gəlinir. Bəlkə Xodukinin Sizin mövqeyinizdə oynatdığı futbolçudan güclü olmadığınız üçün əsas heyətə düşmürsünüz?

- Hər halda mən heç kimdən zəif deyiləm. Bunu mənim oyunuma baxan da deyə bilər. Ümumi futbol prinsipləri ilə götürsək, yəqin ki, əsas heyətdə mən oynamalıyam.

- Demək, futboldankənar amillərə görə oynamırsınız?

- Yəqin ki...

- Nəyi nəzərdə tutursunuz? Bəlkə aranızda bir konflikt olub?

- Yox, konflikt-zad yoxdur.

- Bəlkə Xodukinin sevimli oyunçuları var?

- Onu deyə bilmərəm.

- Bəs hansı futboldankənar amillərdən danışırsınız?

- (gülür) Onun da vaxtı var. Deyərik. Hara tələsirsən.

- Bu açıqlamalarınız üzündən başqa kluba keçidinizdə Sizə problem yaradılacağından qorxmursunuz?

- “İnter”lə müqaviləm başa çatır. Heç bir problem yaradılan deyil.

- Danışıqlar apardığınız klub var?

- Yox, hələ heç nə yoxdur.

- Təklif də yoxdur?

- Xeyr.

- Qış transfer dövründə münasib klub tapacağınıza ümidlisiniz?

- Tapsam, görəcəksiniz. Tapmasam da, nə bilim...

- Karyeranızı bitirəcəksiniz?

- Yəqin ki.

- Əslində klub çoxdur. Yəqin ki, ən pis halda Ədaim Niftəliyev kimi “Bakılı”da da çıxış etməyinizdə bir problem yaranmaz...

- Bu barədə indidən bir söz deyə bilmərəm. Hər halda, münasib klub olmasa, futbolla vidalaşacağam.

- Müqavilənizin başa çatdığını bilə-bilə indiyədək heç bir klubun Sizinlə danışıqlara başlamaması bir qədər inandırıcı deyil...

- Hələ birinci dövrə indi qurtarır. Görək dövrələrarası fasilə vaxtı hansı təkliflər olar.

- Ümumiyyətlə, bundan sonra nə qədər çıxış etmək fikriniz var?

- Nə qədər gücüm çatsa, o qədər.

Elşən Məmmədov