YAP-ın iclasına getmədikləri üçün ADU-da təhsil alan tələbələrə töhmət verilməsi, təkcə, həmin universitetin deyil, bütün universitetlərin tələbələrinin etirazına səbəb olub. ANS PRESS-in məlumatına görə, ADU-nun Filologiya və Jurnalistika fakultəsinin dekanı Sevda Vahabova YAP-ın iclasında iştirak etməyən 14 tələbəyə töhmət verəcəyi ilə bağlı əmr verib.
Əmrin şəkili sosial şəbəkələrdə yayıldıqdan sonra, tələbələr bununla bağlı etirazlarını bildiriblər. Məsələn, sosial şəbəkə istifadəçisi Rüstəm Cəfər deyir ki, "universitet tələbəyə töhməti yalnız o zaman verə bilər ki, o, universitetin qaydalarını pozsun. YAP təhsilə aidiyyatı olmayan siyasi partiyadır və bunun fakultəyə heç bir dəxli yoxdur. "
Məsələ ilə bağlı ADU-nun mətbuat xidmətinin rəhbəri Kazımova Şəfaqət bildirdi ki, dekanın əmrindən nə universitet rəhbərinin, nə də idarə heyətinin xəbəri olmayıb. Onun sözlərinə görə, əmr dekanatlıq daxili verilib.
"Bununla bağlı bu gün iclas keçiriləcək. Fakultə dekanı Sevda Vahabova ilə bağlı müvafiq ölçü götürüləcək. Bizim universitetdə umumiyyətlə heç kim YAP-a üzv olmağa məcbur edilmir. Kimsə də üzv olubsa, onu iclasa məcbur göndərmirik. Odur ki, həmin tələbələrə qarşı töhmət mümkün deyil".
Sosial şəbəkə istifadəçilərinin məlumatına görə, analoji hadisə ötən il Azərbaycan Dövlət Pedaqoji Universitetində yaşanıb. Filologiya fakültəsinin dekanı konsert proqramına məcbur hər qrupdan jurnal siyahısı ilə 15 tələbənin getməsini əmr edib. Konsert dərsdən sonra axşam saat 19:00-da olub. Konsertdə iştirak etməyən tələbələrə isə ertəsi gün töhmət verilib.
