“Bakı 2015” Avropa Oyunları dünyanın artıq 51 ölkəsində yayımlanacaq. Belə ki, Avropa Oyunları Əməliyyat Komitəsi birinci Avropa Oyunlarının İrlandiyanın televiziya kanalında işıqlandırılmasını təmin etmək məqsədilə “Setanta Sports” idman kanalı ilə yayım sazişi imzalayıb.

Sazişə əsasən, İrlandiyanın idman yarışlarını yayımlayan aparıcı premium şəbəkəsi “Setanta Sports” “Bakı 2015” Avropa Oyunlarını hər gün səkkiz saat müddətində, o cümlədən, gündəlik əsas məqamları yayımlayacaq, “Açılış” və “Bağlanış” mərasimlərini nümayiş etdirəcək.

Təşkilat Komitəsindən qeyd edilib ki, İrlandiyada 1.2 milyondan artıq evdə yayımlanan “Setanta Sports” idman kanalı bütün dünyadakı premium məzmunla, o cümlədən İngiltərə Premyer Liqası, UEFA Çempionlar Liqası və Avropa Liqası, Reqbi üzrə Avropa Çempionlar Kuboku, Formula 1 yarışları, “The Masters”, “The Open” və Amerikanın Milli Futbol Liqası (NFL), Milli Basketbol Assosiasiyası (NBA) və “Nascar” adlı gündəlik şousu ilə sıx bağlıdır.


Həqiqət İSABALAYEVA