“Ləzzət otağı”da saxta pul satan şəxs məhkəmə qarşısında

“Ləzzət otağı”da saxta pul satan şəxs məhkəmə qarşısında
11:39 6 Yanvar 2015
168 Ölkə
Ölkə mətbuatı
A- A+

Bu gün Bakı Ağır Cinayətlər Məhkəməsində saxta pul dövriyyəsində ittiham olunan Kürdəmir rayon sakini Kamil Məmmədovun cinayət işi üzrə məhkəmə prosesi başlayıb. Lent.az-ın məlumatına görə, hakim Səbuhi Hüseynovun sədrliyi ilə keçirilən prosesdə təqsirləndirilən şəxsin cinayət işi üzrə məhkəmənin hazırlıq iclası olub. Kamil Məmmədovun anket məlumatları dəqiqləşdiriləndən sonra məhkəmə baxışı yanvarın 13-nə təyin olunub.

 

Qeyd edək ki, əvvəllər məhkum olunmuş Kamil Məmmədovun saxta pullar əldə edərək satmaq istəməsi barədə Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə əməliyyat məlumatı daxil olduqdan sonra dərhal axtarış tədbirlərinə başlanılıb.

Polis əməkdaşları Kamil Məmmədovu paytaxtın Nizami rayonu Qara Qarayev prospektində yerləşən “Ləzzət otağı” kafesində saxlayıblar. Kamil Məmmədov 200 ədəd saxta 100 manatlıq əsginasları 4 min ABŞ dollarına satarkən cinayət başındaca tutulub. Onun üstünə baxış zamanı əlavə olaraq 56 ədəd 100 manatlıq, 4 ədəd 50 manatlıq saxta pul əsginasları aşkar edilərək götürülüb. Bundan əlavə Kamil Məmmədov satış nəticəsində əldə etdiyi 4 min həqiqi Amerika dollarını da əməliyyatçılara təqdim edib.
Saxlanılan şəxs ifadəsində bildirib ki, saxta manatları ölkəmizdən kənarda hazırlatdırıb və dövriyyəyə daxil etmək üçün gizli yolla Bakı şəhərinə gətirib. Saxta pul nümunələrinə baxış zamanı əsginasların xüsusi peşəkarlıqla hazırlandığı, həqiqi manatdan bir o qədər seçilmədiyi müəyyən olunub.
 

RƏYLƏR

BU KATEQORİYADAN DİGƏR XƏBƏRLƏR