Fevralın 4-də "Rustavi azot" zavodunun qarşısında yenə etiraz aksiyası keçirilib. APA-nın Gürcüstan bürosunun gürcü mətbuatına istinadən məlumatına görə, etiraz mitinqi həmin gün daha geniş şəkildə keçirilib. Aksiyada keçmiş zavod işçiləri və həmkarlar ittifaqının nümayəndələri, tələbələr və digər iştirakçılar “Rustavi müəssisəsinin işçiləri şərtsiz olaraq işlərinə bərpa olunsun!" tələbi ilə çıxış ediblər. Aksiya iştirakçıları tələblərində yeni əmək müqaviləsi hazırlanmasını və mövcud əmək müqavilələrinin ləğv edilməsini tələb ediblər.
İştirakçılar bildiriblər ki, onların tələbi qəbul olunmazsa, etiraz aksiyası davam edəcək.
Müəssisənin metallurgiya, dağ-mədən və kimya sənayesi həmkarlar ittifaqının sədri Tamaz Dolaberidze bildirib ki, etiraz aksiyası çərçivəsində bazar ertəsi Tiflisdəki Azadlıq meydanından "Gürcüstan Bankı “nın mərkəzi filialının qarşısınadək yürüş təşkil olunacaq: “Biz ölkə iqtisadiyyatına daha çox töhfə veririk. Buna görə də hüququmuzun bərpası uğrunda sona qədər mübarizə aparacağıq”, - deyə T. Dolaberidze bildirib.
Qeyd edək ki, Rustavidə fəaliyyət göstərən “Rustavi azot” kimya zavodunun qarşısında 9 gündür ki, etiraz aksiyası keçirilir.
