Bakı. 24 oktyabr. REPORT.AZ/ Yüksək neft qiymətləri investorlara neft fyuçerslərinə investisiya edən fondlardan (ETF) çıxmaq üçün yaxşı imkan yaradıb. "Report" "Vestifinance.ru" saytına istinadən xəbər verir ki, sentyabr ayından başlayaraq, neft kontraktlarına yatırım edən nəhəng ETF fondlarının müştəriləri aktiv şəkildə vəsaitlərini çıxarmağa başlayıblar. Buna səbəb, ABŞ-da avtomobil mövsümünün başa çatması fonunda neftə tələbatın azalması amili göstərilir.
Belə ki, "United States Oil Fund"dan 13-23 oktyabr tarixlərində 67 mln., son 7 həftə ərzində isə yarım milyard dollara yaxın vəsait çıxarılıb. Digər nəhəng fond olan "ProShares Ultra Bloomberg Crude Oil"dan müştərilər son bir həftədə 20 mlrd. dollar, sentyabrdan etibarən isə 200 mlrd. dollar çıxarıb. Digər fondlarda da vəziyyət eynidir.
İnvestorlar enerji daşıyıcılarının qiymətinin hazırkı səviyyədən artmasına inanmırlar. Bunun səbəbi neft qiymətlərinin son 2 ilin maksimal həddinə çatıb və buradan geri dönmək ehtimalı yüksəkdir. Lakin investisiya fondları cari qiymətlərin bir qədər də yüksələ biləcəyini istisna etmir. Xatırladaq ki, əgər yay aylarında neft qiymətlərinin artmasına qoyulan investisiya onun azalmasına qoyulan vəsaiti 10 dəfə üstələyirdisə, hazırda bu göstərici 2,5 dəfəyə enib.
"Saxo Bank"ın analitiki Ole Hansen (Ole Hansen) hesab edir ki, "neft fyuçerslərində investorların mövqeləri qiymətlərin artmasına mane olur. Neft qiymətlərinin bu günə qədər yüksəlməsinə səbəb olan investorlar, onların azalmasını da sürətləndirə bilər. Gec və ya tez son dövrlərdə neft kontraktlarından əldə olunan mənfəəti götürmək üçün səbəb yaranacaq. Bu da qiymətlərin düşməsinə gətirib çıxaracaq".
