[ 21 Yanvar 2015 19:17 ]
Bakı. Cavid Zeynallı – APA. Azərbaycan “Marı-2015-ci il Türk Dünyasının Mədəniyyət Paytaxtı”nın açılış mərasimində təmsil olunacaq.
Mədəniyyət və Turizm Nazirliyindən APA-ya verilən məlumata görə, tədbir çərçivəsində estrada, folklor və türk xalqlarının rəqs ansambllarının konserti, eyni zamanda TÜRKSOY-a üzv ölkələrin mədəniyyət və turizm imkanlarının təşviq olunması, tanıdılması məqsədilə təsviri-dekorativ sənət ustalarının, həmçinin fotoqrafların əsərlərinin sərgisi təşkil ediləcək.
Mərasim yanvarın 27-də keçiriləcək.
Azərbaycanı tədbirdə nazirliyin Mədəniyyət siyasəti şöbəsinin müdiri Fikrət Babayev, "Cəngi" estrada folklor ansamblı və əl sənətkarlarından ibarət nümayəndə heyəti təmsil edəcək.
Qeyd edək ki, ötən il noyabrın 21-də Kazan şəhərində keçirilən TÜRKSOY Daimi Şurasının XXXII iclasının qərarı əsasında Türkmənistanın Marı şəhəri “2015-ci ilin Türk Dünyasının Mədəniyyət Paytaxtı” elan olunub.
