Bakı, 22 iyun, AZƏRTAC
Tovuzun Əyyublu kəndi ərazisində yerləşən Menteştəpə qədim yaşayış məskənində səkkiz il öncə başlanılan işlərə yekun vurulur.
Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutu Tovuz arxeoloji ekspedisiyasının Fransa Milli Elmi Araşdırmalar Mərkəzinin mütəxəssisləri ilə birgə apardığı tədqiqatların əsas məqsədi Kür çayının orta axarında qədim yaşayış məskənlərini tədqiq etməkdir. Radio-karbon analizlərinin nəticələri abidənin bizim eradan əvvəl VI minilliyə aid olduğunu deməyə əsas verir.
AMEA-dan AZƏRTAC-a bildirilib ki, tədqiq edilən bu abidə Azərbaycanın qədimliyini bir daha dünyaya nümayiş etdirir. Yaşayış məskənində Neolit dövründən başlayaraq erkən tunc dövrünədək minillikləri əhatə edən mindən artıq nadir və qədim maddi mədəniyyət nümunəsi aşkarlanıb. Arxeoloji materiallar arasında qızıl əşyalar da var.